- Пред точно 50 години во тогашниот неделник „Фокус" се појавува текст од младиот поет Владимир Шопов (тогаш на возраст од 23 години), син на Ацо Шопов, за тоа што се случило на 16-от меѓународен саем на книгата во Белград.
- Сервилноста на тогашната политика многу наликува на она што и денес ни се случува, но не и револтот на младите.
- „Овој саем во Белград покажа дека расчекорот помеѓу она што претставува официјален став, како сегмент на нашата заедничка политика и она што се чини без осет за селективен приод кон нештата може да биде од полза за трети, а тие во настојувањата да го зголемат бодовното салдо на својата хипокризна, односно како што тие ја нарекуваат, „конструктивна патриотска политика“, настапуваат кон нас како Тројански коњ во чија утроба Каин го остри веќе многупати употребуваниот нож“.
- Доналд Трамп го прашал Си Џинпинг дали Кина сака да купи американско оружје, изјави амбасадорот на САД во Пекинг, Дејвид Пердју. Не прецизира дали понудата ја дал на самитот во Вашингтон пред неколку дена или во Пекинг во мај.
- „Претседателот Трамп постојано вели дека САД продаваат оружје низ светот. Тој всушност во еден момент го праша претседателот Си дали би сакал да купи“, изјави Пердју за Фокс њуз.
- „Законот на САД забранува продажба на оружје на Кина и не постои понуда или план за продажба на оружје на Кина“, соопшти Стејт департментот.
- Спроти самитот во мај, Трамп ја одложи продажбата на пакет американско оружје за Тајван во вредност од 14 милијарди долари како „добар адут за преговори“ со Пекинг.
- Пердју потврди дека САД не ја промениле својата политика во однос на Тајван: го почитуваат ставот на Пекинг „Една Кина“, но во исто време му даваат безбедносна поддршка на Тајпеј.
- Европската Унија првпат планира да одреди целни датуми за завршување на клучните фази од преговорите за пристапување со Црна Гора, Албанија, Украина и Молдавија, изјавија за Политико функционери од Брисел.
- Овој пристап содржи „патокази“, кои појасно ќе дефинираат што точно се очекува од секој кандидат. Во исто време ќе се дефинираат и обврски за сегашните членки на ЕУ, кои треба да дадат согласност за да продолжи процесот.
- На другите земји-кандидати кои се во „порана фаза од процесот“, како Косово, Македонија и Босна и Херцеговина, нема да им бидат понудени овие патокази. Истото важи и за Грузија, Србија и Турција.
- Ревизијата на политиките, предводена од Александар Адам, близок советник на претседателката на Европската комисија Урсула фон дер Лајен, треба да биде претставена на 6 октомври, а шефовите на држави од ЕУ ќе расправаат за темпото за прием на нови членки на самитот во Брисел на 15 и 16 октомври.
- Фон дер Лајен оваа недела оди на турнеја низ Западен Балкан на разговори со лидерите на Црна Гора, Албанија, Македонија и Косово. Ќе ги заобиколи Босна и Херцеговина и Србија, кои се пред избори.
