- САД и Израел објавија дека почнале „превентивен напад“ врз Иран. Експлозии утрово одекнувале во Техеран и во градовите Ком, Керманшах, Исфахан и Караџ.
- Жители на Техеран јавија експлозии во квартот во кој се претседателската палата, Националниот совет за безбедност и резиденцијата во која вообичаено престојува ајатолахот Али Хамнеи. Според извори на Ројтерс, ајатолахот не бил во Техеран и бил префрлен на безбедна локација.
- „Пред кратко време, американската војска почна голема борбена операција во Иран. Нашата цел е да го одбраниме американскиот народ со елиминирање на заканите од иранскиот режим“, објави Доналд Трамп.
- „Ќе ги уништиме нивните ракети и ќе ја срамниме со земја нивната ракетна индустрија. Ќе ја уништиме нивната морнарица. Ќе се погрижиме терористичките групи во регионот повеќе да не можат да го дестабилизираат регионот или светот. Ќе се погрижиме Иран да не добие нуклеарно оружје. Тоа е многу едноставна порака. Тие никогаш нема да имаат нуклеарно оружје. Овој режим наскоро ќе научи дека никој не треба да ја оспорува силата и моќта на оружените сили на САД“, изјави Трамп.
- Израелски офицер изјавил дека цел на нападите се комплетното иранско раководство.
- Нападите главно биле извршени преку територијата на Ирак. Не е забележана активност од двата носачи на авиони во регионот.
- Израел прогласи вонредна состојба, во очекување на одмазднички напади од Иран.
- Иран формира нова дигитална платформа за осигурување „Ормуз сејф“, како ново владино тело за управување со бродскиот сообраќај низ Ормускиот проток. Платформата ќе се потпира на плаќања со криптовалути.
- Според планот на Министерството за економија, управувањето со теснецот преку рамка за осигурување би овозможило издавање на разни полиси за поморско осигурување, како и сертификати за финансиска одговорност, наместо да се наплаќа „патарина“. При идеални околности, ова би можело да генерира до 10 милијарди долари приходи за Техеран.
- Планот ќе почне со осигурување кое покрива инспекција, задржување и конфискација на бродови. Штетата од воени напади нема да биде покриена.
- „Овој модел би бил прифатлив за другите земји во мирно време, а сепак би му дозволил на Иран да врши контрола врз теснецот“, објави државната новинска агенција Фарс.
- Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
- Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
- „Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
- Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
- Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.
