- „Македонија е мала држава, се знаевме од порано и со едните и со другите. Бизнисменот Орце Камчев имаше доверба во мене, постигнавме спогодба. Во државниот буџетот уплати 5 милиони 200 илјади евра на име затајување данок и доби една година ефективен затвор“, рекла Вилма Русковска на српска телевизија.
- Шефицата на Основното јавно обвинителство истакнала дека спогодбата со Камчев била потпишана откако легнале парите.
- Кажете друга држава во која јавна обвинителка ќе се фали дека некој осуден на затворска казна имал доверба во неа?
- Словенците со сопствени обновливи извори на струја од јули ќе може да го споделуваат вишокот генерирана енергија за да им ги намалат месечните сметки на роднини и пријатели низ целата земја.
- Преку системот „Мој електро“ ќе може да договараат споделувања на вишок генерирана струја со еден или повеќе потрошувачи и да го определат количеството.
- Потрошувачите не мора да живеат во истиот град, па дури ни во регионот. На пример, родителите во дом со соларни панели во Марибор ќе можат да им го префрлаат вишокот струја на своите деца што студираат во Љубљана и да им ги намалат сметките.
- Струјата физички нема да патува низ мрежата, туку ќе се бележи административно и ќе се одразува исклучиво на сметката на примателот, во интервали на фактурирање на секои 15 минути.
- Освен ефектот на солидарност, цел на мерката е да ја балансира енергетската мрежа во периоди на големо производство на сончева енергија.
- Владата на Канада достави до парламентот предлог-закон за забрана на пристап до социјални мрежи за деца и тинејџери помлади од 16 години. Ќе се воспостави проверка на возраста.
- Исклучок ќе бидат платформите што ќе докажат дека воспоставиле ефикасни заштитни мерки за пристап до штетни содржини - поттикнување насилство, омраза, самоповредување и споделување интимни слики без согласност.
- Се создава и Комисија за дигитална безбедност, која ќе треба да дефинира критериуми и ограничувања за пристап до четботови со вештачка интелигенција.
- Австралија лани беше првата земја што забрани социјални мрежи за лица под 16 години. Слични закони се во процедура во Франција, Данска, Полска и Грција.
- Според проценките на канадската влада, може да помине цела година додека законот не биде усвоен од Парламентот во Отава, а потоа уште година и пол за воспоставување на новото регулаторно тело.
