Вести › Набрзинка

Русија, Украина и САД првпат заедно на преговори

23 јануари 2026

Високи претставници од Русија, Украина и од САД ќе ја одржат првата трилатерална средба за крај на војната. Европа ќе ја нема на масата.
Русија ги опиша разговорите во Абу Даби како „корисни во секој поглед“, но забележа дека долгорочен мировен договор не може да има сè додека не се решат територијалните прашања. Претседателот Владимир Путин вчера во Москва разговарал со американските претставници Стив Виткоф и Џаред Кушнер.
Украинскиот претседател Володимир Зеленски изрази надеж дека Русија ќе биде подготвена за компромис: „Сè е околу територијата“.
Главно барање на Русија е Украина да се откаже од 25% од регионот Доњецк што сè уште го контролира.
Виткоф минатата година изјави дека Русија се согласила да им дозволи на САД и Европа да ѝ дадат на Украина „робусни“ безбедносни гаранции.
Украина ќе ја претставуваат шефот на националниот совет за безбедност Рустем Умеров, Кирило Буданов - шефот на канцеларијата на Зеленски, преговарачот Давид Арахамија и началникот на Генералштабот Андриј Хнатов. Руската делегација ќе ја води генералот Игор Костјуков, директор на воената разузнавачка агенција ГРУ.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор