Вести › Набрзинка

RIP Чак Норис

20 март 2026

На возраст од 86 години на Хаваи почина Чак Норис, поранешeн шампион во боречки вештини и херој на акциони филмови, персонификација на безмилосен јунак со натприродна сила.
„За светот, тој беше боречки уметник, актер и симбол на сила. За нас, тој беше посветен сопруг, грижлив татко и дедо, неверојатен брат и срцето на нашето семејство. Тој го живееше својот живот со вера, цел и непоколеблива посветеност на луѓето што ги сакаше. Преку неговата работа и дисциплина и љубезност, тој инспирираше милиони луѓе низ целиот свет и остави траен впечаток врз толку многу животи“, објави неговото семејство.
Шесткратниот шампион во карате (без пораз) ја почна филмската кариера како главен негативец против Брус Ли во „Патот на Змејот“ (се тепаа во Колосеумот во Рим). Потоа се прослави со улогите во „Вокер, Тексашкиот ренџер“ и „Делта форс“.
Молчеливоста и ледениот израз на лицето му донесоа култен статус. Беше неисцрпна инспирација за „факти“ - вицеви во кои секогаш и без исклучок ги победуваше сите противници, дури и законите за природата.
Наместо да го оплакуваат, фановите потсетуваат:

Чак Норис нема смртен час. Смртта има Чак Норис час.

Чак Норис не умира од срцев удар. Срцевиот удар умира од удар на Чак Норис.

Чак Норис умрел пред 20 години. Смртта дури сега собрала храброст да му каже.

извор

Иран ќе наплаќа „осигурување“ за премин на Ормускиот проток

18 мај 2026

Иран формира нова дигитална платформа за осигурување „Ормуз сејф“, како ново владино тело за управување со бродскиот сообраќај низ Ормускиот проток. Платформата ќе се потпира на плаќања со криптовалути.
Според планот на Министерството за економија, управувањето со теснецот преку рамка за осигурување би овозможило издавање на разни полиси за поморско осигурување, како и сертификати за финансиска одговорност, наместо да се наплаќа „патарина“. При идеални околности, ова би можело да генерира до 10 милијарди долари приходи за Техеран.
Планот ќе почне со осигурување кое покрива инспекција, задржување и конфискација на бродови. Штетата од воени напади нема да биде покриена.
„Овој модел би бил прифатлив за другите земји во мирно време, а сепак би му дозволил на Иран да врши контрола врз теснецот“, објави државната новинска агенција Фарс.

извор

Путин им нуди руски пасоши на жителите од регионот отцепен од Молдавија

18 мај 2026

Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
„Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.

извор