Вести › Набрзинка

Путин го процени Гренланд на 1 милијарда долари

22 јануари 2026

„Она што се случува во Гренланд воопшто не ја загрижува Русија. Тоа прашање САД и Данска треба да го решат меѓу себе“, порача претседателот Владимир Путин.
При евентуалното пазарење помеѓу Данска и САД за Гренланд, Путин ја процени вредноста на островот на околу 1 милијарда долари – сума за која смета дека Вашингтон може да си ја дозволи.
Тој потсети дека продажбата на Алјаска од Русија на САД во 1867 година за 7,2 милиони долари и продажбата на Девствените Острови од Данска на САД во 1917 година, се преседани што оправдуваат трансакции со територии.
„Патем, Данска отсекогаш се однесувала кон Гренланд како кон колонија и била груба, ако не и сурова, кон неа. Но, тоа е сосема друго прашање и сега речиси никој не е заинтересиран за тоа“, изјави Путин на состанок на националниот Совет за безбедност.

извор

Сè што треба да знаете за светот денес: Косово е во Одборот за мир, Словенија не е

22 јануари 2026

Доналд Трамп денеска официјално го промовираше својот Одбор за мир во Газа, со амбиции да прерасне во тело што ќе има поширока глобална улога за спречување конфликти.
Трамп објави дека десетици држави ја прифатиле поканата за членство во Oдборот, но листата не е конечна и постојано се менува. Според Белата куќа и медиумски извештаи, од близу 50 поканети држави, 35 официјално или принципиелно прифатиле да учествуваат во одборот. Меѓу нив е и Косово, чија претседателка Вјоса Османи денеска свечено ја потпиша декларацијата.
Словенија им се приклучи на Франција, Норвешка и Шведска, кои категорично ја одбија поканата да учествуваат во Одборот за мир.
„Главната загриженост е што мандатот на комитетот е премногу широк и би можел опасно да го поткопа меѓународниот поредок заснован на Повелбата на Обединетите нации“ изјави претседателот Роберт Голоб.
Трамп е претседател на Одборот со неограничен мандат. Учеството во Одборот е условено со уплаќање членарина од 1 милијарда долари.

извор

Бихаќка сите незадоволни ги направи вмровци

22 јануари 2026

СДСМ ги обвини поранешниот градоначалник на Скопје, Петре Шилегов, и поранешниот директор на ТИРЗ, Јован Деспотовски, дека како членови на партијата одработувале за ВМРО-ДПМНЕ, а дури и дека биле координирани со владејачката партија.
„ВМРО, Шилегов, Деспотовски, сите користат иста реторика, исти техники од кујните и пораките ги шират преку истите провладини портали“, велат од СДСМ и наведуваат дека јасна била координацијата меѓу нив.
Петре Шилегов побара оставка од актуелното раководство на СДСМ заради катастрофалните резултати. Го обвини Венко Филипче дека ја води партијата кон исчезнување.
„Да ја сведете поддршката на партијата на само стотина илјади гласови и само 15 пратеници, да станете петта партија во Скопје, трета во Македонија, што е тоа ако не катастрофа?“, праша Шилегов.
Јован Деспотовски, кого матичната партија го нарече „квислинг“, побара извинување.
Последниов период СДСМ е во разуздана офанзива против сите оние кои ги смета за непријатели, вклучувајќи новинари и медиумски куќи.