Мобилниот оператор на семејството Трамп потврди дека поради безбедносна дупка протекле лични податоци за 27.224 луѓе што го нарачале новиот „златен“ мобилен телефон Т1.
На интернет биле откриени имиња, електронски и поштенски адреси на луѓето што платиле депозит за телефонот, вклучувајќи и идентификатори на нарачките.
Внатрешната истрага на TrumpMobile утврдила дека не се загрозени чувствителните финансиски податоци за платежните картички и банкарските сметки. „Нема повреди на мрежата, системите или на инфраструктурата“, изјави портпаролот Крис Вокер.
Телефонот Т1 во златна боја беше пласиран на пазарот со задоцнување од цела година. Раните купувачи се регистрираа и платија депозит од 100 долари, за да го добија телефонот по привилегирана цена од 499 долари.
Производителите отстапија од првичната најава дека телефонот целосно ќе биде произведен во САД и втиснаа погрешно американско знаме на позадината.
Вселенската компанија SpaceX на Илон Маск успешно ја тестираше Starship V3, најмоќната и најголемата ракета во историјата.
Starship V3 беше лансирана од космодромот на Маск во Тексас, исфрли во орбита 20 тест-сателити и по еден час се врати во атмосферата, падна во Индискиот Океан и експлодираше, како што беше планирано.
„Честитки до тимот за епското лансирање и спуштање. Постигнавте голем успех за човештвото“, порача Маск.
„Еден чекор поблиску до Месечината... Еден чекор поблиску до Марс“, честиташе шефот на НАСА, Џаред Исакман.
Ракетата Starship V3, висока колку 40-катница, е дизајнирана за првите летови со екипаж до Марс. Може да однесе во вселената летало или сателити со вкупна тежина од над 100 тони, а потоа контролирано да се спушти заради повторно користење.
Успешниот тест му помага на SpaceX да привлече повеќе инвеститори кога во јуни ќе се појави на берзите, со рекордно висока почетна вредност од околу 1.250 милијарди долари.
Тулси Габард, директорката за национално разузнавање во администрацијата на Доналд Трамп, поднесе оставка поради семејни причини, за да може повеќе да се грижи за сопругот, кој страда од екстремно ретка форма на рак на коските.
Габард ќе замине од функцијата на 30 јуни. Должноста привремено ќе ја преземе нејзиниот заменик Арон Лукас.
Политички кругови во Вашингтон коментираат дека оставката на Габард била прашање на време, бидејќи поранешната демократка не се вклопила во републиканската администрација. Таа беше во судир со ЦИА, која според инсајдери ги попречувала напорите на националното разузнавање да открие повеќе информации за досиејата на Џон Кенеди, за потеклото за ковид и за „хаванскиот синдром“.
Габард, исто така, се противеше на политиката за воени интервенции. Трамп лани јавно го отфрли сведочењето на Габард дека Иран не ја обновил програмата за развој на нуклеарно оружје. „Мојата разузнавачка заедница грешеше... Таа греши“, изјави Трамп.
Кога почна војната, на прашањето дали Иран претставува непосредна закана за САД, Габард пред конгресмените одговори: „претседателот е единствената личност што може да утврди што е, а што не е непосредна закана“.
Пред два месеци оставка поднесе и нејзиниот помошник Џо Кент, директор на Центарот за борба против тероризам. Од администрацијата беа отпуштени и поранешната секретарка за внатрешна безбедност Кристи Ноем и државната обвинителка Пам Бонди. Лори Чавез-ДеРемер поднесе оставка од функцијата секретарка за труд.
