Вести › Набрзинка

Прибирање на вработените кои поскапеа

21 септември 2025

Во пресрет на новите ограничувања и такси за работните визи во САД што стапија на сила викендов (види овде), многу работодавци ги советуваа своите вработени во странство веднаш да се вратат во САД.
По потпишувањето на указот со кој визите за високостручни и високообучени лица поскапуваат од 1.000 на 100.000 долари, не беа јасни детали како ова ќе се спроведува и за кого сè ќе важи уредбата.
Подоцна и надлежните институции и Белата куќа објаснија дека новите цени важат само за оние кои допрва ќе аплицираат за вакви визи. Но, тоа не им беше јасно на американските компании кои имаат ангажирано вакви лица па ги советуваа:

- ако се во САД, да не ја напуштаат земјата (бидејќи не се знае колку скап ќе биде влезот).
- ако не се во САД, веднаш да направат патни аранжмани и да слетаат во Америка пред указот на Трамп да стапи на сила.

The Verge ги објавува протечените пораки од Амазон, Гугл и Микрософт.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор