Андреј Ѓоргиески од дуото ДНК, им подлегнал на повредите од пожарот во Кочани. Имал тешки изгореници и се обидувал да им помогне на гостите кога избувнал пожарот кога и го загубил животот. Гo идентификувала сопругата.

Загинал и Филип Стевановски од Куманово. Беше продуцент, пијанист, тромбонист и композитор, магистар по џез науки, вработен како професор во штипскиот државен музички училишен центар и годинава назначен за директор на Центарот за култура во Штип.

Во несреќата загинал и тапанарот на ДНК, Ѓорѓи Ѓорѓиев од Струмица. “Ѓорѓи ќе биде запаметен како млад и надежен музичар кој својата страст за музиката ја споделуваше со сите околу себе. Секогаш позитивен, насмеан и мотивиран да создаде нешто убаво, тој беше инспирација за многу млади таленти“, пишуваат струмичани.

Загинала и Сара Пројковска, придружен вокал на ДНК. „Со длабока жалост и неверица ве известуваме дека нашата колешка, вонр.проф.м-р Сара Пројковска, го загуби животот во невидената трагедија во Кочани. Нашата Сара, полна со љубов, живот и музика, лавица и добрица...“ се простија од Факултетот за музичка уметност.

Загинат е и штипскиот гитарист Александар Коларов. Со Филип од бендот биле женети со сестрите Ирена и Маја. 

Трагичниот пожар во ноќниот клуб „Пулс“ во Кочани однесе уште еден живот – Мартин Атанасовски, попознат како Буцо Битбокс.

И фотографот Александар Ефремов, кој ги следеше Андреј и Панчо на скоро сите настапи низ државава, е меѓу загинатите во пожарот што се случи во дискотеката Пулс во Кочани. Млад, талентиран.

Панчо со изгореници на рацете и лицето е хоспитализиран и на кислородна поддршка.