Вести › Набрзинка

Потенцијалните победници во Германија планираат излегување од ЕУ

30 ноември 2024

Крајно десничарската партија Алтернатива за Германија (АфД) планира својата изборна програма да ја заснова на напуштање на Европската Унија, Парискиот договор за климатските промени и еврото, објави германската новинска агенција ДПА, пред предвремените избори најавени за февруари.
Предлогот на новата нацрт програма повикува и на построги закони за абортусот, укинување на економските санкции против Русија и реактивирање на гасоводот Северен тек, преку кој евтиниот природен гас од Русија стигнуваше во Германија.
„Сметаме дека за Германија е нужно да ја напушти Европската Унија и да формира нова европска заедница“, се истакнува во документот.
Што се однесува до еврото, нацрт програмата предвидува враќање на марката како национална валута.

29 октомври 2026

Владата на Еди Рама воведе парични казни до 500.000 леки (околу 5.500 евра) за луѓе што учествуваат на насилни протести во Албанија.
Сумата е приближно шест просечни плати. Казната ќе важи за сите демонстранти, без оглед дали лично биле вклучени во насилства. Лица што го кријат идентитетот се соочуваат со казни од 10.000 до 100.000 леки.
Албанци од мај демонстрираат во Тирана против проектот за изградба на комплекс со луксузни хотели во природен резерват. Во компанијата вклучена во проектот учествува и Џаред Кушнер, зетот на Доналд Трамп.
Кон средината на октомври, протестите се проширија со студентски барања поврзани со корупцијата, проблемите во здравствениот систем и недостатокот на перспективи за младите.
Во изминатите денови имаше и жестоки судири на демонстрантите со полицијата во Тирана.

29 октомври 2026

По реакција на Германија и други членки, ЕУ се откажа од планот Канада да добие статус на „придружна членка“ на Европската Унија.
Во нацрт-текстот на изјавата што ќе биде објавена на крајот од самитот Канада-ЕУ во Монтреал, изразот „придружно членство“ е заменет со „сè поблиска асоцијација“.
Германија реагирала дека претседателката на Европската комисија, Урсула фон дер Лајен, не се консултирала со членките пред да ја претстави идејата во своето годишно обраќање во септември. Резервираност изразиле и Франција, Италија и Грција.
„Се чини дека никој не бил консултиран за придружно членство освен нејзиниот најблизок персонал. Многу земји-членки, вклучително и Германија, не беа задоволни“, изјави дипломат од Брисел.