Вести › Набрзинка

После Шпанија, и Италија не ги дава базите

31 март 2026

Италија одбила да им дозволи на САД да ја користат воздухопловната база Сигонела на Сицилија.
Одбивањето дошло откако италијанските власти биле информирани за планот за летот на неколку американски авиони, што вклучувало слетувања во Сигонела па заминување кон Блискиот Исток.
Извори на Кориере дела Сера велат дека Американците им ги кажале плановите на Италијанците кога нивните авиони веќе биле во воздух.
И Шпанија го затвори својот воздушен простор за американските воени летала порачувајќи дека не дозволува користење на воените бази или воздушниот простор за дејствија поврзани со војната во Иран.

31 март 2026

Со нова онколошка терапија, лекарите од Клиничко-болничкиот центар во Ријека успешно ги третирале здравствените компликации што се појавиле како резултат на третманот на примарната болест - тумор на жолчниот канал.
Станува збор за хипербарична кислородна терапија, првпат пробана на хрватската писателка и колумнистка со остар јазик, Ведрана Рудан.
Ѝ било подобро веќе после три дена, болките престанале и ѝ се вратил апетитот - за две недели вратила 10 килограми.
„Денес одам, јадам, пијам и повторно живам. Единствен проблем ми е што не знам дали е ова сон или реалност,“ вели Рудан.

31 март 2026

Иранските власти одобрија план со кој се предвидува „патарина“ за сите комерцијални бродови кои минуваат низ Ормускиот Теснец.
Висината на таксата ќе зависи од тонажата и видот на товарот. Најмногу ќе бидат погодени нафтените танкери, со оглед на тоа што низ овој теснец минува околу 20% од светската нафта.
Меѓународните правни експерти го оспоруваат овој потег, повикувајќи се на Конвенцијата на ОН за правото на морето, која гарантира слободен премин низ меѓународните теснеци. Но, Иран тврди дека бидејќи тие го гарантираат мирот во овие води, имаат право на надомест за безбедност.
Се проценува дека ова ќе доведе и до покачување на цената на нафтата и до поскапување на осигурувањето: бродовите ќе мора да плаќаат повисоки премии поради ризикот од заплена доколку не платат патарина.