Вести › Набрзинка

Погодена Амбасадата на САД во Ријад

3 март 2026

Два дрона ја погодиле Амбасадата на САД во Ријад, Саудиска Арабија, предизвикале штета и пожар, но немало повредени лица. Претседателот Доналд Трамп предупреди дека ќе следува одмазда, но не прецизираше кој е одговорен за нападот.
Претходно беа погодени и амбасадите на САД во Кувајт и во Јордан. Во Багдад, демонстранти два дена протестираат пред амбасадата на САД и фрлаат камења, но не бил пробиен периметарот на безбедност.
Говорејќи пошироко за војната против Иран, Трамп изјави дека САД имаат залихи за „вечна војна“. „Резервите со муниција на САД никогаш не бие подобри. Имаме практично неограничено количество на располагање. Со нашите залихи можеме да водиме војна вечно и успешно“, порача Трамп. Еден ден претходно тој истакна дека очекува војната да заврши за 4 недели.
Централната команда на САД вчера потврди дека шест американски војници досега загинале во војната против Иран. На прашањето дали е загрижен поради нападите врз САД, Трамп одговори: „Не, тоа е дел од војната. Дали тоа им се допаѓа на луѓето или не, тоа е така“.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор