- По меѓународна потерница од Интерпол Србија, Блерим Рамадани од Косово беше уапсен на 17 јули на граничниот премин Јажинце. Истиот ден бил спроведен во притвор во Шутка, но по жалба на неговиот адвокат, судијата на претходна постапка Пајазит Пајазити мерката притвор ја преиначил во куќен притвор, па Блерим Рамадани на 1 август од Шутка заминува на адреса на свои роднини во Чаир.
- Сега Блерим Рамадани е избеган од куќен притвор.
- Зошто судијата Пајазити воопшто прифатил жалба на човек кој се бара за сторени воени злосторства?
- „Во сите други случаи се определува притвор и за ситни кривични дела, а за ваквов случај каде се бара екстрадиција се определува куќен притвор што е во најмала рака чудно и е спротивно на праксата во земјава. Редно е да почне да се бара одговорност. Не можат судиите и обвинителите за своето работење да бидат заштитени бели мечки и да не одговараат“, вели адвокатот Звонко Давидовиќ.
- Пајазит Пајазити (на фотосот) е судијата кој го одби барањето на обвинителството и не одреди притвор за групата која предводена од чаирскиот шеф на ДУИ Беким Незири упадна во М-НАВ.
- „Германија се враќа! Германија прави значителен придонес за одбраната на слободата и мирот во Европа. Ова е јасна порака до нашите партнери, но и до непријателите на нашата слобода. Способни сме да се одбраниме“, објави идниот канцелар Фридрих Мерц откако обезбеди поддршка од Зелените за огромно задолжување на владата.
- За такво задолжување неопходно е да се промени Уставот. Конзервативците на Мерц, заедно со социјалдемократите и Зелените имаат двотретинско мнозинство во актуелниот состав на Бундестагот.
- Со задолжувања ќе биде формиран фонд од 500 милијарди евра за обнова на инфраструктурата. Поголемиот дел ќе биде насочен кон одбранбените капацитети.
- Зелените на преговорите издејствувале 100 милијарди за „климатска трансформација“.
- Вредноста на златото првпат во историјата ја надмина психолошката граница од 3.000 долари за една унца (28,35 грама).
- Само од почетокот на оваа година, цената на златото се зголемила за 14 отсто.
- Златото традиционално се смета за најбезбедна инвестиција во време на инфлација или економска нестабилност. Таква нестабилност се очекува како последица на царинските војни што американскиот претседател Доналд Трамп ги почна со светот.
- Инвеститорите проценуваат дека златото сè уште не ја достигнало максималната вредност, која до крајот на годинава би можела да стаса до 3.300 долари за унца.
