Според проценката на директорот на Управата за извршување на санкции, Александар Пандов, во некои затвори повеќе од половина од вработените се вклучени во коруптивни активности.
За девет месеци во македонските установи биле откриени околу 1.000 мобилни телефони, додека во Хрватска во цела 2023 година биле пронајдени само 26.
Пандов информираше дека се завршени сите процедури за електронски мониторинг на затворениците со алки, а во наредните недели тие ќе бидат ставени во функција.
Во меѓувреме се случи скандал во штипскиот затвор – полицајци му помагале на затвореник да си ја најде дрогата.
Австралија го додаде и Јутјуб на списокот забранети социјални медиуми за деца, по извештајот дека 37% од тинејџерите пријавиле загрозувачка содржина на најпопуларната платформа за видеа. Забраната на пристап на деца на возраст под 16 години ќе се спроведува од 10 декември.
„Децата во Австралија се под негативно влијание на онлајн платформите. Сакам родителите да знаат дека ја имаат нашата поддршка“, изјави премиерот Ентони Албанезе.
Се очекува Јутјуб да ја обжали забраната, затоа што не се смета за социјален медиум: „Нашата позиција е јасна. Јутјуб е платформа со видеотека со слободна и квалитетна содржина, која се следи и на телевизори. Не е социјален медиум“.
Содржини на Јутјуб во Австралија следат три четвртини од децата на возраст помеѓу 13 и 15 години. Забраната нема да важи за специјализираната верзија YouTube Kids.
Јапонија и Хаваи спроведуваат масовни евакуации поради опасност од цунами низ Пацификот, предизвикани од силниот земјотрес на Камчатка.
Потресот со интензитет од 8,8 Рихтерови степени кај Петропавловск е шести според јачина од сите што досега биле регистрирани во историјата. Жариштето било на длабочина од 19 километри. Се очекуваат афтершокови со месеци.
Источниот брег на Русија го погодиле бранови од цунами со височина од 3 до 4 метри. Има повредени лица и од брановите и од земјотресот.
Првиот удар на северниот јапонски остров Хокаидо бил со бранови од 40 сантиметри, но се стравува и од бранови од 3 метри. Јапонија повика 1,9 милион луѓе да се засолнат подалеку од брегот и на повисоко.
Најсилниот удар се очекува на Хаваите, каде што се очекуваат цунами од над 3 метри. Низ Хонолулу вијат сирени. Градоначалникот Рик Бланџарди ги повика жителите да ги следат препораките, да не паничат и да се оддалечат од брегот.
Тревога поради можно цунами кренаа и делови од западниот брег на САД, Кина, Индонезија, Филипините, Еквадор и Перу - 13.000 километри на југ од Камчатка.
