Вести › Набрзинка

Ортодоксните Евреи се кренаа против Израел

20 октомври 2025

Десетици илјади ултраортодоксни Евреи вчера блокираа блокови околу конзулатот на Израел во Њујорк, протестирајќи против најавата дека воената обврска ќе биде проширена и за свештените лица.
Од формирањето на државата Израел во 1948 година рабините и нивните ученици се ослободени од задолжителната воена служба, која во Израел е најмалку 32 месеци.
Врховниот суд лани ѝ нареди на владата на Израел да регрутира и ултраортодоксни мажи, но одлуката не беше спроведена поради заканите од верските партии дека ќе го напуштат кабинетот на Бенјамин Нетанјаху.

Демонстрантите порачале дека „Државата Израел и нејзините акции не ги претставуваат Евреите и јудаизмот“ и истакнале пароли како: „Подобро би умреле како Евреи, отколку да живееме како ционистички војници“.
Се проценува дека Израел може да регрутира околу 80.000 ултраортодоксни Евреи на возраст помеѓу 18 и 24 години. Израелските сили тврдат дека итно им се потребни најмалку 12.000 нови регрути за да ги зајакнат активните и резервните состави.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор