- Џоел Мокир, Филип Агион и Питер Ховит се добитници на Нобеловата награда за економија за 2025 година, поради објаснувањето како иновациите управуваат со економскиот раст, објави шведската Кралска академија на науките.
- Една половина од наградата ќе му припадне на Мокир поради „идентификување на предусловите за одржлив раст преку технолошки напредок“.
- „Тој покажа дека не само што треба да знаеме дека нешто функционира, туку треба да имаме и научни објаснувања зошто. Второто честопати недостасува пред индустриските револуција, што го отежнува растот врз основа на нови откритија и пронајдоци“, објави академијата.
- Другата половина ќе ја поделат Агион и Ховит „за теоријата за одржлив раст преку креативно уништување“. Во студија од 1992 година тие конструирале математички модел за загубите што ги трпат компаниите кога на пазарот ќе влезе нов и подобар производ.
- „Лауреатите покажаа како „креативното уништување“ создава конфликти кои мора да се управуваат на конструктивен начин. Во спротивно, иновациите ќе бидат блокирани од веќе етаблирани компании и групи на кои им се загрозени интересите“, објави академијата.
- Бугарското Национално собрание по итна постапка усвои закон што на државата ѝ овозможува да преземе директна контрола врз рафинеријата на руската компанија Лукоил во Бургас.
- Цел на Законот е да се обезбеди работење на најголемата рафинерија на Балканот откако Лукоил поради санкции од САД беше принуден да го продаде својот имот во странство.
- Владата ќе назначи специјален администратор, кој ќе управува со компанијата ако се оцени дека постои ризик по националната или енергетската безбедност на земјата. Бугарската влада тврди дека ова не е национализација, туку „заштитна мерка што ќе се активира само ако работењето на рафинеријата биде загрозено“.
- Администраторот ќе има право да гласа во името на акционерите, да управува со средствата и, ако е потребно, да предложи продажба или преструктурирање на делови од компанијата.
- Рафинеријата во Бургас обезбедува најголем дел од горивата за бугарскиот пазар и овозможува извоз во соседните земји.
- Турција објави налози за апсење на израелскиот премиер Бенјамин Нетанјаху и високи функционери во неговата влада. Ги обвинува за геноцид против Палестинците во Газа и злосторства против човештвото.
- На списокот се 37 израелски функционери, вклучувајќи ги министерот за одбрана Израел Кац, министерот за национална безбедност Итамар Бен Гвир и началникот на Генералштабот на Израелските одбранбени сили Ејал Замир.
- Во соопштението на Анкара се спомнува и инцидентот од март годинава, кога беше гранатирана „Болницата за пријателство“, изградена од Турција во Појасот Газа. Израелските одбранбени сили во тоа време соопштија дека објектот го користеле оперативци на Хамас и дека „не бил користен како активна болница повеќе од една година“.
- Отфрлајќи ги обвиненијата, израелскиот министер за надворешни работи Гидеон Саар ги нарече „најновата пи-ар акција на тиранинот Ердоган“.
- „Налозите за апсење на високи израелски функционери јасно објаснуваат зошто Турција не треба да биде присутна во Појасот Газа - директно или индиректно“, порача поранешниот министер за надворешни работи Авигдор Либерман. Турција сака да биде дел од меѓународните сили за стабилизација од планот на Доналд Трамп за повоена Газа.
