Вести › Набрзинка

Низ Франција се шири полициски час за деца

23 јули 2025

Сè повеќе француски градови воведуваат полициски час за движење на деца по низата насилни пресметки поврзани со трговија со дрога. Според Министерството за внатрешни работи, повеќе од 110 луѓе биле убиени и 300 биле ранети во 2024 година во пресметка меѓу нарко-банди низ Франција.
Ним вчера воведе забрана за движење од 21 до 6 часот на лица помлади од 16 години „за да не бидат изложени на насилство“ и ги зајакна полициските патроли. Во неколку улични престрелки во овој град во изминатиот месец беше убиено едно лице, а неколкумина беа ранети. Градоначалникот Жан-Пол Фурние изјави дека ситуацијата е „неодржлива“ и дека наркобандите создале „клима на страв и терор“.
Безие, кој лани воведе полициски час од 23 до 6 часот за деца под 13 години сега ја прошири забраната до возраст од 15 години. „Десетгодишник што се шета по улици во 2 часот не е ништо друго туку пакосник“, изјави градоначалникот Робер Менар.
Лимож воведе забрана за ноќно движење на деца помлади од 13 години за време на летниот распуст.
Франција неодамна усвои закон за зголемување на затворските казни за наркобароните, формирање ново одделение на обвинителството и доделување специјален заштитен статус за информатори.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор