- Астронаутите на Артемис II кои сега се наоѓаат поблиску до Месечината отколку до Земјата, се соочуваат со многу овоземен проблем: нужникот не им работи.
- Проблемите настанале веднаш по полетувањето а од тогаш тоалетот те работи, те не работи.
- Астронаутите пријавиле непријатен мирис а капетанот на посадата уверува дека се добро и дека се тренирани за разни предизвици.
- Дописни водоводџии на НАСА претпоставуваат дека мраз ја има заглавено одводната цевка.
- Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
- Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
- „Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
- Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
- Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.
- Американците кумулативно потрошиле околу 45 милијарди долари повеќе на бензин и дизел за време на војната со Иран отколку во истиот период пред една година, според анализата на податоците за цените.
- Ако цените на бензинот останат близу до сегашните нивоа до крајот на 2026 година, JPMorgan проценува дека Американците ќе издвојат 172 милијарди долари повеќе отколку минатата година.
- Само во текот на март, американските авиокомпании потрошиле речиси 1,3 милијарди долари повеќе за керозин отколку во истиот месец лани, според Министерството за транспорт.
- Економистите веруваат дека поголемите поврати на даноци оваа година им помогнале на многу Американци да ги пребродат раните фази од шокот. „Враќањата драматично ќе се намалат во мај, оставајќи ги потрошувачите повеќе изложени на порастот на трошоците за гориво“, оцени Оливер Ален, виш американски економист во Pantheon Macroeconomics.
- Поскапувањето на горивото најсилно ги погодува потрошувачите со ниски и средни приходи, покажуваат анализите. Трендот се поврзува со падот на политичкиот рејтинг на претседателот Доналд Трамп, кој води кампања за преполовување на трошоците за енергија на Американците.
