- Израелскиот премиер ги обвини меѓународните медиуми за „глобална кампања на лаги“ за гладот во Газа и најави тужба против Њујорк Тајмс.
- „Да имавме политика на изгладнување, никој во Газа немаше да преживее после две години војна“, рече Нетанјаху со напомена дека Израел има допуштено влез на два милиона тони храна која подоцна ја краде Хамас.
- Биби тврди дека жители на Газа го „молат“ Израел да ги ослободи од Хамас и дека тоа што тие го прават таму не е окупација туку ослободување.
- Нетанјаху вели дека војната може одма да заврши ако Хамас го положи оружјето, но бидејќи тие тоа не го прават, Израел мора да ја заврши работата која ја започнал.
- Австралија во септември ќе ја признае Палестина „за да ја прекине спиралата на насилство“ на Блискиот Исток. Ќе им се придружи на Франција, Британија и Канада, кои најавија дека ќе го сторат тоа на Генералното собрание на ОН во Њујорк.
- „Австралија ќе го признае правото на Палестинците да имаат сопствена држава. Решението со две држави е најдобрата надеж на човештвото за да се прекине спиралата на насилства на Блискиот Исток и конечно да запрат војната, страдањата и гладувањето во Газа“, изјави премиерот Ентони Албанезе. Тој истакна дека единствен услов за признавањето на Палестина се гаранциите дека Хамас нема да има улога во идната палестинска власт.
- Австралијците ја притискаат владата на Албанезе да воведе санкции за Израел поради уништувањето на Газа. Повеќе од 90.000 луѓе во Сиднеј пред неколку дена беа на протестен марш во знак на поддршка на Палестинците.
- И Нов Зеланд најави дека „ќе ја преразгледа позицијата“ и дека би можел да ја признае Палестина. „Нов Зеланд следи дали се исполнети условите за одржлива палестинска држава, во поглед на безбедноста, политиката, дипломатијата и економијата. Нашите партнери се поделени за ова прашање. Кабинетот ќе донесе одлука до септември“, изјави министерот за надворешни работи, Винстон Питерс.
- Русија продолжила да развива нуклеарни проектили со среден и краток дострел за време на мораториумот за поставување вакво оружје и сега поседува значително голем арсенал, изјави вицепремиерот Сергеј Рјабков.
- „Уште кога беше објавен мораториумот јасно кажавме дека тој се однесува само на распоредување и дека воопшто не се спомнати активности за истражување и развој. Го искористивме времето за да развиеме системи и да создадеме прилично добар арсенал“, изјави Рјабков.
- Москва пред неколку дена објави дека го укинува едностраниот мораториум за поставување проектили со среден дострел, бидејќи на тоа ја принудиле потезите на САД и нивните сојузници.
- Договорот за проектили со среден и краток дострел беше потпишан од САД и Советскиот Сојуз во 1987 година, како чекор кон намалување на тензиите помеѓу суперсилите од времето на Студената војна. САД се повлекоа од мораториумот во 2019 година, за време на првиот претседателски мандат на Доналд Трамп.
