- Израелскиот премиер Бенјамин Нетанјаху ги повика Иранците да го искористат американско-израелскиот напад за да го соборат режимот во Техеран. Истото го побара и лани во јуни, кога САД и Израел извршија ограничени напади со проектили врз Иран.
- „Народот треба да се ослободи од јаремот на тиранијата и да донесе слободен и мирен Иран. Нашата заедничка акција ќе создаде услови храбриот ирански народ да ја земе својата судбина во свои раце, изјави Нетанјаху.
- „На овој убиствен терористички режим не смее да му се дозволи да се здобие со нуклеарно оружје што би му овозможило да го загрози целото човештво“, додаде израелскиот премиер и му се заблагодари на американскиот претседател Доналд Трамп „за неговото историско водство“.
- Најмалку 40 девојчиња загинале откако проектил истрелан од САД и Израел погодил основно училиште во јужен Иран, соопштија локалните новински агенции.
- Проектилот го погодил училиштето Шаџарех Тајебех во градот Минаб во јужната покраина Хормозган, кога во него имало 170 девојчиња. Жртвите се на возраст помеѓу 7 и 12 години, според агенциите Тасним и Фарс.
- Повредени се 45 лица, а не се знае точно колку луѓе се блокирани под урнатините.
- Локалната агенција Мехр јави дека уште двајца ученици загинале при напад врз училиште источно од главниот град Техеран.
- Норвешка оцени дека нападот на САД и Израел е спротивен на меѓународното право. „Нападот е опишан како превентивен удар. За спроведување превентивни напади мора да има непосредна закана“, оцени министерот за надворешни работи Еспен Барт.
- Русија повика на итно запирање на нападите на САД и Израел врз Иран. „Ситуацијата мора да се реши со политички и дипломатски дијалог. Меѓународната заедница треба итно да даде објективна проценка за неодговорни дејствија што ризикуваат уште поголемо дестабилизирање на регионот“, објави Министерството за надворешни работи.
- Украина ја префрли одговорноста за војната врз иранските власти: „Режимот во Техеран ја имаше секоја можност да спречи насилно сценарио... Причината за актуелните настани е токму насилството и неказнивоста на иранскиот режим, особено убиствата и репресиите врз мирните демонстранти, кои зачестија во последните месеци.“
- Шефицата за надворешна политика на Европската Унија, Каја Калас, ја оцени ситуацијата како „опасна“ и повика на заштитата на цивилите и меѓународното хуманитарно право.
- Британија порача дека на Иран никогаш не смее да му се дозволи да развива нуклеарно оружје.
