- Изборната комисија на Молдавија вчера им забрани на две проруски партии да учествуваат на парламентарните избори утре.
- Партиите Срце на Молдавија и Молдавија Маре, се исклучени поради наводно нелегално финансирање, поткуп на гласачи и непријавени странски средства. Двете партии водеа кампања за поблиски врски со Москва.
- Сите кандидати предложени од Срцето на Молдавија ќе бидат отстранети од листата на Патриотскиот изборен блок (БЕП), кој е еден од главните предизвикувачи на владејачката партија Акција и солидарност (ПАС). На блокот му се дадени 24 часа да ја прилагоди својата листа на кандидати.
- Молдавија Маре е забранета поради „купување гласови, скриено финансирање од странство и вмешаност во камуфлиран изборен блок со забранета партија“.
- Гласањето во недела се смета за клучно за Молдавија, поранешна советска република која стана кандидат за членство во Европската Унија во 2022 година. Од 2021 година, ПАС на претседателката Маја Санду има силно парламентарно мнозинство, но аналитичарите предупредуваат дека би можела да ја изгуби таа позиција од опозициските блокови што се сметаат за проруски.
- САД соопштија дека ќе ја поништат визата на колумбискиот претседател Густаво Петро, откако тој преку мегафон на пропалестински уличен протест во Њујорк ги повика американските војници да не го слушаат својот претседател Доналд Трамп. Стејт департментот ги опиша повиците на Петро како „неодговорни и потпалувачки“. Пред да му ја укинат визата, тој веќе бил на пат за Богота.
- „Од тука во Њујорк, ги молам сите војници во Армијата на САД не ги насочуваат своите пушки кон човештвото. Не почитувајте ја наредбата од Трамп! Почитувајте го редот на човештвото! Како што се случи во Првата светска војна, сакам младите луѓе, синови и ќерки на работници и земјоделци, и од Израел и од САД, да ги насочат своите пушки не кон човештвото, туку кон тираните и кон фашистите“, порача Петро.
- Колумбискиот претседател повика на формирање светска армија на спасението, чија прва задача би била ослободување на Палестина: „Светските нации ќе придонесуваат со војници во армијата, која ќе ги спроведува наредбите на меѓународната правда и која мора да биде поголема од американската војска“.
- Говорејќи претходно пред Генералното собрание на ОН, Петро побара кривична истрага за воздушните напади на администрацијата на Трамп врз бродови во Карибите што наводно пренесувале дрога. Тој истакна дека нападите не биле заради контрола на трговијата со дрога, туку заради „задоволување на потребата да се користи насилство за доминација врз Колумбија и Латинска Америка“.
- Лефтерис Харалампопулос, кој ја истражувал поврзаноста на фондацијата „Отворено општество“ на Џорџ Сорос, УСАИД и нивното влијание преку поранешниот македонски премиер Зоран Заев за постигнување на контроверзната Преспанска спогодба меѓу Македонија и Грција, заклучил дека фондацијата „Отворено општество“ во Македонија во периодот од 2012 до 2016 година добила речиси 5 милиони долари, кои требало да бидат искористени за дестабилизација на тогашната македонска влада и за поставување нова, која би била пофлексибилна за постигнување договор за промена на името на државата“, објави неодамна То вима.
- Ако се покажат како точни наводите од истражувањето на грчкиот медиум, дека некоја од страните е поткупена, корумпирана, за да работи за одредена цел, тогаш таквиот договор во согласност со меѓународното право е постигнат без добра верба и е наметнат. Како таков не може да има меѓународно-правен легитимитет и што поскоро по сила на меѓународното право треба да биде поништен.
- Ако договорите со Грција и Бугарија се склучени спротивно на принципот „бона фиде“, тогаш не е никаков правен ниту политички грев кога ќе постои соодветна процена и надворешна поддршка, како држава потписничка да се повлечеме од нив. Впрочем, многу западни земји, меѓу кои и САД, се повлекоа од над 50% од меѓународните договори откако констатираа дека тие им нанесуваат штета, заклучуваат соговорници на „Нова Македонија“.
- Измама, изнуда, притисок или уцена и заблуда претставуваат основа за раскинување, поништување и укинување договори, без разлика дали станува збор за домашни или за меѓународни акти, појаснува професорот по меѓународно право Игор Јанев.
