- Аеродромот во Михнен ноќеска беше затворен неколку часа поради надлетувања од неидентификувани беспилотно летала.
- Поради идентични закани во изминатите две недели беа блокирани и аеродромите во Копенхаген и во Осло. Не е потврдено дали надлетувањата се координирани и кој ги управувал дроновите. Ниту еден не е соборен.
- Данската полиција истражува сомневања дека леталата биле испратени од брод во Балтичко Море, но Минхен е оддалечен 1.000 километри.
- На самитот во Копенхаген европските лидери постигнаа согласност за зајакнување на безбедноста кон Исток со поставување „воздушен ѕид“ за откривање, следење и пресретнување на непријателски дронови.
- Кремљ ги отфрла сите обвинувања дека е одговорен за надлетувањата. „Добро, нема повеќе. Ни во Франција ни во Данска ни во Копенхаген... ни во Лисабон“, одговори на шега рускиот претседател Путин на прашањето „зошто испратил толку многу дронови во Данска“.
- Бугарското Национално собрание по итна постапка усвои закон што на државата ѝ овозможува да преземе директна контрола врз рафинеријата на руската компанија Лукоил во Бургас.
- Цел на Законот е да се обезбеди работење на најголемата рафинерија на Балканот откако Лукоил поради санкции од САД беше принуден да го продаде својот имот во странство.
- Владата ќе назначи специјален администратор, кој ќе управува со компанијата ако се оцени дека постои ризик по националната или енергетската безбедност на земјата. Бугарската влада тврди дека ова не е национализација, туку „заштитна мерка што ќе се активира само ако работењето на рафинеријата биде загрозено“.
- Администраторот ќе има право да гласа во името на акционерите, да управува со средствата и, ако е потребно, да предложи продажба или преструктурирање на делови од компанијата.
- Рафинеријата во Бургас обезбедува најголем дел од горивата за бугарскиот пазар и овозможува извоз во соседните земји.
- Турција објави налози за апсење на израелскиот премиер Бенјамин Нетанјаху и високи функционери во неговата влада. Ги обвинува за геноцид против Палестинците во Газа и злосторства против човештвото.
- На списокот се 37 израелски функционери, вклучувајќи ги министерот за одбрана Израел Кац, министерот за национална безбедност Итамар Бен Гвир и началникот на Генералштабот на Израелските одбранбени сили Ејал Замир.
- Во соопштението на Анкара се спомнува и инцидентот од март годинава, кога беше гранатирана „Болницата за пријателство“, изградена од Турција во Појасот Газа. Израелските одбранбени сили во тоа време соопштија дека објектот го користеле оперативци на Хамас и дека „не бил користен како активна болница повеќе од една година“.
- Отфрлајќи ги обвиненијата, израелскиот министер за надворешни работи Гидеон Саар ги нарече „најновата пи-ар акција на тиранинот Ердоган“.
- „Налозите за апсење на високи израелски функционери јасно објаснуваат зошто Турција не треба да биде присутна во Појасот Газа - директно или индиректно“, порача поранешниот министер за надворешни работи Авигдор Либерман. Турција сака да биде дел од меѓународните сили за стабилизација од планот на Доналд Трамп за повоена Газа.
