„Така денес изгледа Македонија, вистински, автентичен фашизам, кога ги гледа презрените Роми како плачат и молат да не им се одземаат колите, затоа што немаат возачка дозвола. Законот е за сите, грми власта, нема толеранција, нема неказнивост, сите сме еднакви пред законот, жестоко ќе возвратиме.

Ех, да е само власта. Читајте низ Фејсбук и Твитер, како со исмевање гледаат на солзите на нашите сограѓани, Ромите. Никој не им верува на солзите на Циганите. Особено драгите, вечни Македонци, кои и за Шиптариштата имаат збор-два фашизам да кажат“ пишува Биљана Секуловска во својата колумна „Циганите летаат на небо“.    

„Некој би рекол дека ова е класичен автошовинизам, типичен за тоа миље кое со децении преживува упикувајќи се во странски задници и мразејќи ги сопствените сограѓани, небаре тоа е највисок стадиум на цивилизираност.

Јас пак велам, не! Ова е голема мисла. Ова е фасцинантен облик на оригинално размислување. Ова е суд на моралната величина која од горе гледа како Македонците (и останатите граѓани) се препелкаат во омраза и примитивизам. Некој би рекол дека тврдењето засновано на прелистување социјални мрежи и лични фрустрации е еднакво глупо како и се останато што со децении излегува од подрумот на Фрчко, но јас сум сигурен дека греши. Јас со торжествена возбуда потврдувам: Така е, ние сме фашисти, треба сите да не стрелаат!“, коментира Драган Милосављевиќ.