Вести › Набрзинка

Литванија ја затвори границата со Белорусија

27 октомври 2025

Литванија ги затвори двата гранични премини со Белорусија поради зачестените инциденти со шверц на цигари со балони преку границата, изјави премиерката Инге Ругиниене. Премините ќе останат затворени најмалку до среда. Ќе се пропуштаат само граѓани на Литванија, на членки на ЕУ и лица со дипломатски пасоши.
Аеродромот во Вилнус три вечери по ред откажуваше летови поради приближување на шверцерски балони во зоната што ја користат патничките авиони. Привремено бил блокиран и аеродромот во Каунас, кој е подалеку од Белорусија. Во изминатата недела биле одложени или пренасочени 170 летови што погодило речиси 30.000 патници.
Премиерката објави дека силите за безбедност ќе добијат право да ги соборуваат балоните што ќе навлезат во литвански простор. Тоа се балони на топол воздух натоварени со штеки цигари. Поевтини се од беспилотни летала и може да носат поголем товар. Лани од Белорусија долетале 966 шверцерски балони.
Минск ја оцени оваа одлука како „провокација, со цел да се прошират антибелоруските политики и да се засилат санкциите“.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор