Вести › Набрзинка

Јутјуб ќе му плати 22 милиони отштета на Трамп

30 септември 2025

Јутјуб се согласи да му плати отштета од 22 милиони долари на претседателот Доналд Трамп затоа што го блокирал на платформата по упадот во Капитолот во Вашингтон на 6 јануари 2021 година. На другите оштетени ќе им бидат исплатени 2,5 милиони долари.
Причина за замрзнувањето била оценката дека „содржината може да доведе до поголемо насилство“. Трамп го тужеше Јутјуб поради цензура. Најави дека парите од отштетата ќе ги донира во Фондот за изградба на салата за бал во Белата куќа и за Националниот мол.
Соочена со слична тужба, Мета, матичната компанија на Фејсбук и Инстаграм, во јануари му исплати на Трамп отштета од 25 милиони долари. Платформата Икс прифати да плати околу 10 милиони долари за да го реши спорот со блокирањето на профилот на Трамп во 2021 година. Икс му го деблокираше профилот на Трамп набргу откако Илон Маск ја купи компанијата во 2022 година. Јутјуб и Мета го деблокираа во 2023 година.
Соочени со тужби за клевета на Трамп, Парамаунт во јули се согласи да му исплати 16 милиони долари, а ABC News 15 милиони долари.
Како одговор на истрагата дали социјалните платформи го ограничувале говорот по налог на администрацијата на Бајден, Јутјуб пред една недела соопшти дека ќе ги врати профилите на креаторите на содржини што беа забранети поради наводно ширење дезинформации поврзани со пандемијата на ковид и изборите во 2020 година.

извор

Пропадна дилот за мигранти на Британија и Франција

2 октомври 2026

Британија и Франција постепено ќе го укинат договорот за размена на мигранти според принципот „еден внатре – еден надвор“, бидејќи биле депортирани премалку лица.
Од склучувањето на договорот во август 2025 година па заклучно со 1 октомври годинава, во Франција биле вратени повеќе од 1.500 нелегални мигранти, а во спротивна насока биле префрлени нешто помалку од 1.500 легитимни баратели на азил во Британија.
Проценетите трошоци за шемата изнесуваат 56.000 фунти по вратен мигрант, што достигнува вкупна сума од околу 84 милиони фунти.
За споредба, во истиот период повеќе од 40.000 нелегални мигранти пристигнале во Обединетото Кралство со мали чамци.
Лондон бил подготвен да го продолжи договорот, но Париз одбил, со образложение дека сака шема за враќање на ниво на целата Европска Унија.

извор

Прв септември без урагани во Атлантикот во овој век

2 октомври 2026

Изминатиот септември беше првиот по 32 години во кој немало ниту еден ураган во Атлантикот. Ова се случило само три пати досега – во 1994, во 1972 и во 1962 година.
Просекот е 7 урагани во сезона, од кои 2 до 3 се во септември.
Аномалијата се смета за последица на пацифичкиот климатски феномен Ел Нињо, за кој се предвидува дека годинава ќе биде најсилен досега.
Оваа година може да биде првата без ниту еден ураган во Атлантикот откако во 1950 година почна да се води прецизна евиденција. Во просек во октомври се формира по еден ураган годишно, а повремено може да има и во ноември.
Најмалку, само по два, имало во 1982 и 2013 година.

извор