Вести › Набрзинка

Италија воведе доживотна робија за фемицид

26 ноември 2025

Италија стана една од ретките земји што за посебно кривично дело го прогласи фемицидот - убиство на жена поради нејзиниот пол. Парламентот едногласно го усвои законот со кој е предвидена доживотна робија за фемицид.
Законот ќе се применува за случаи на убиства за кои ќе се утврди дека биле поттикнати од омраза, дискриминација, доминација или контрола само поради тоа што жртвата била жена. Ќе бидат опфатени и одмаздничките напади врз жени што раскинале врска, вклучувајќи и закани и следења.
Повод за законот беше убиството на Џулија Чекетин пред две години. Нејзиниот партнер ја избодел со нож и телото ѝ го фрлил во езеро. По ова злосторство, владата го засили финансирањето за центри за згрижување жртви на насилство и за кампањи против насилства врз жени.
Статистичката агенција на Италија објави дека лани имало 106 дела на фемицид, од кои 62 биле извршени од партнери на жртвите. Хрватска, Малта и Кипар се единствените земји во ЕУ што воведоа фемицид како правна дефиниција во кривичните закони. Во светот нема општо прифатена дефиниција.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор