Вести › Набрзинка

И Кина е за глобално олимписко примирје

9 октомври 2025

Шефот на кинеската дипломатија Ванг Ји ја поддржал иницијативата на Рим за прекин на огнот во сите војни во светот додека се одржуваат Зимските олимписки игри во февруари идната година, изјави неговиот италијански колега Антонио Тајани.
Повикувајќи се на античката традиција, Италија повика на глобално примирје додека спортистите се натпреваруваат за олимписки медали во Милано и Кортина од 6 до 22 февруари.
Тајани најави дека ќе достави официјален предлог до Обединетите нации. „За време на Игрите во Милано-Кортина, повикуваме на примирје во сите војни, вклучувајќи ги оние во Украина и на Блискиот Исток. Мора да бидеме шампиони на мирот“, порача Тајани.
Во модерната ера на Олимписките игри, по 1896 година, ваквите повици немале плод. Повеќе пати биле откажани олимписки игри поради војни (во 1916, 1940 и 1944 година) отколку војни поради Игрите.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор