Вести › Набрзинка

Холандски новинари тужат заради забраната на РТ и Спутник

26 мај 2022

Со тужба во Судот на правдата на ЕУ, главното здружение на холандски новинари ја оспорува одлуката на ЕУ за забрана na руските државни медиуми и ја оценува како кршење на правата на европските граѓани на слобода на информирање.
„Во суштина ги казнувате европските граѓани, со тоа што не ги третирате како возрасни и не им давате можност за пристап до информации“, вели Томас Брунинг од здружението.
Холандските новинари предупредуваат дека ваква одлука би можела да биде вовед во забрана и на други политизирани медиуми и порачуваат дека цензурата е лесен, но не и вистински одговор.

извор

Уште 2.000 резервисти и 700 маринци во ЛА

10 јуни 2025

На четвртиот ден од протестите против миграциската политика на Доналд Трамп, претседателот испрати уште 2.000 припадници на Националната гарда во Лос Анџелес. Таму веќе беа распоредени 2.100 резервисти.

Пентагон неколку часа порано испрати зајакнување од 700 мариници за да ги заштитуваат федералните објекти. Маринците се обучени за разбивање протести, но во ризични зони во други земји, како во Авганистан или Ирак. Ќе го носат стандардното оружје, не и солзавец. Не смеат да пукаат предупредувачки истрели. Имаат мандат да ја деескалираат ситуацијата и да дејствуваат во самоодбрана. Ќе може да приведуваат лица, но ќе мора да ѝ ги предадат на полицијата.

Калифорнија поднесе тужба против претседателот Доналд Трамп поради нарушување на суверенитетот на сојузната држава. Претседателот возврати дека гувернерот Гевин Њусом ќе биде уапсен ако ги попречува акциите федералните служби.
Протести на солидарност синоќа беа одржани во Далас и во Остин во сојузната држава Тексас.
Паралелно со протестите, продолжуваат рациите на Службата за имиграција и царина за приведување нелегални мигранти во Лос Анџелес.

извор

Српска изборна класика: Вучиќ победува, опозицијата не признава

9 јуни 2025

Завршија вонредните локални избори во Заечар и Косјериќ, кои се гледаа како лакмус за расположението на народот после 6 месечните протести и блокади на студентите и граѓаните кои ги поддржуваа.
Повикувајќи се на записниците кои ги имаат потпишано и опозиционите учесници во изборите, Александар Вучиќ соопшти дека неговата Српска напредна странка во Косјериќ победила тесно а во поголемиот Заечар убедливо.
Рече дека изборите минале во услови досега невидени на српската политичка сцена и атмосфера на линч, прогон, малтретирање на граѓаните, закани, уцени, кршење на сите законски норми, кршење на елементарните изборни правила...
Вучиќ е горд и задоволен од резултатите, особено на оние во Заечар кадешто освоиле 3.000 гласови повеќе од минатите избори.
„Невидена кражба,“ соопшти опозицијата и порача дека не ги признава резултатите по што повика на протести пред владата.