Вести › Набрзинка

Горан Ангелов Ќосето условно на слобода по 8 години во затвор

6 декември 2025

Горан Агелов Ќосето е пуштен условно на слобода, откако помина осум години во затвор по пресудата за насилниот упад во Собранието на 27 април 2017 година.
Ангелов за МКД.мк потврди дека добил условен отпуст, откако отслужил две третини од казната, односно 8 од вкупно 11 години затвор. Тој е првиот што доби условен отпуст од оваа постапка, за која сите обвинети тврдеа дека е политички монтиран процес.
Од првото судење па сè до денес тој тврди дека не е виновен за кривичното дело терористичко загрозување на уставниот поредок и безбедноста: „Најголема болка е кога не сте виновен, а ви велат дека сте терорист“.
Во случајот за „27 април“ 16 лица беа правосилно осудени на затворски казни кои се движеа од 7 до 16 години затвор.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор