- Финска планира да ја укине забраната за поставување нуклеарно оружје на нејзината територија, за да ги исполни стандардите на НАТО за колективна одбрана.
- Законот за нуклеарна енергија усвоен во 1987 година забранува увоз, производство, поставување и детонирање нуклеарни експлозиви на финска територија. Финска беше неутрална земја во времето на Студената војна, но реши да се приклучи на НАТО по руската инвазија врз Украина.
- Министерот за одбрана Анти Хоконе изјави дека забраната „повеќе не е релевантна“ и дека е невообичаена за членки на НАТО. Тој додаде дека Хелсинки не побарал распоредување нуклеарни проектили на финска територија и нема планови за нуклеарни тестирања во иднина.
- „Ова е изјава што води кон ескалација на тензиите на европскиот континент. Оваа изјава ја зголемува ранливоста на Финска. Факт е дека со распоредувањето нуклеарно оружје на своја територија, Финска почнува да ни се заканува. И ако Финска ни се заканува, ние ќе преземаме соодветни мерки“, изјави портпаролот на Кремљ, Дмитриј Песков.
- Романскиот претседател Никушор Дан изјави дека нема да дозволи поставување делови од нуклеарен систем на романска територија. „Како членка на НАТО, Романија е под нуклеарната заштита што ја нудат САД. Тоа не значи присуство на нуклеарни елементи на романска територија. На среден рок, нема шанси да бидеме домаќини на нуклеарни компоненти“, изјави Дан.
- Емануел Макрон пред неколку дена изјави дека Франција ќе го прошири својот нуклеарен арсенал и ќе им дозволи на европските партнери да прифатат француски воени авиони во мисии за нуклеарно одвраќање. Тој додаде дека Грција, Полска, Холандија, Белгија, Данска и Шведска би можеле да учествуваат на француските нуклеарни воени вежби.
- Иран формира нова дигитална платформа за осигурување „Ормуз сејф“, како ново владино тело за управување со бродскиот сообраќај низ Ормускиот проток. Платформата ќе се потпира на плаќања со криптовалути.
- Според планот на Министерството за економија, управувањето со теснецот преку рамка за осигурување би овозможило издавање на разни полиси за поморско осигурување, како и сертификати за финансиска одговорност, наместо да се наплаќа „патарина“. При идеални околности, ова би можело да генерира до 10 милијарди долари приходи за Техеран.
- Планот ќе почне со осигурување кое покрива инспекција, задржување и конфискација на бродови. Штетата од воени напади нема да биде покриена.
- „Овој модел би бил прифатлив за другите земји во мирно време, а сепак би му дозволил на Иран да врши контрола врз теснецот“, објави државната новинска агенција Фарс.
- Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
- Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
- „Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
- Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
- Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.
