- Францускиот претседател Емануел Макрон ги предупредил европските лидери и Володимир Зеленски дека САД „ќе ја предадат“ Украина – ќе ја принудат да ѝ отстапи територии на Русија, без да ѝ дадат јасни безбедносни гаранции, пишува германскиот весник Шпигел, врз основа на транскрипт од конференциски разговор во понеделникот.
- Мерц му порачал на Зеленски да биде претпазлив, бидејќи „си играат игри и со тебе и со нас“, алудирајќи на американските специјални мировни пратеници Стив Виткоф и Џаред Кушнер.
- „Не смееме да ги оставиме Украина и Володимир сами со овие типови“, додал финскиот претседател Александар Стуб. Со тоа се согласил и генералниот секретар на НАТО, Марк Руте.
- Шпигел тврди дека транскриптот е веродостоен и дека говори за огромната недоверба на европските лидери во мировната иницијатива на Доналд Трамп за крај на војната во Украина. На линија, покрај Макрон, Мерц, Руте и Стуб биле и премиерите на Италија, Полска, Данска и Норвешка, како и лидерите на ЕУ - Урсула фон дер Лејен и Антонио Кошта.
- Конференцискиот телефонски разговор на кој се повикува Шпигел бил во понеделникот, пред Виткоф и Кушнер да се сретнат со рускиот претседател Владимир Путин. По петчасовните разговори во Москва, тие го откажаа брифингот со Зеленски планиран за следниот ден во Брисел.
- Иран формира нова дигитална платформа за осигурување „Ормуз сејф“, како ново владино тело за управување со бродскиот сообраќај низ Ормускиот проток. Платформата ќе се потпира на плаќања со криптовалути.
- Според планот на Министерството за економија, управувањето со теснецот преку рамка за осигурување би овозможило издавање на разни полиси за поморско осигурување, како и сертификати за финансиска одговорност, наместо да се наплаќа „патарина“. При идеални околности, ова би можело да генерира до 10 милијарди долари приходи за Техеран.
- Планот ќе почне со осигурување кое покрива инспекција, задржување и конфискација на бродови. Штетата од воени напади нема да биде покриена.
- „Овој модел би бил прифатлив за другите земји во мирно време, а сепак би му дозволил на Иран да врши контрола врз теснецот“, објави државната новинска агенција Фарс.
- Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
- Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
- „Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
- Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
- Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.
