Европските лидери на самитот во Брисел се договорија да издвојуваат повеќе средства за зајакнување на одбраната и да ја бранат Украина.
„Европа мора да го прифати овој предизвик, оваа трка за вооружување. Цела Европа е способна да победи во каков било воен, финансиски или економски судир со Русија. Едноставно сме посилни“, изјави полскиот премиер Доналд Туск.
Европската комисија ќе помогне со фискална флексибилност за членките и со заем од 150 милијарди евра за воени потреби.
Српските пратеници ги усвоија измените на Законот за високо образование, што беше едно од барањата на студентите што протестираат низ земјата и организираат блокади.
„Исполнето е четвртото барање на студентите од блокадите. Веројатно сега ќе се вратиме на настава“, изјави претседателката на Собранието, Ана Брнабиќ.
Со и изменетиот закон се намалуваат школарините за студентите за 50% и се зголемува буџетот за образование за 20%.
„Во Бања Лука ни е многу јасно дека Бошњаците во Сараево креираат и сакаат воен судир во Босна и Херцеговина“, изјави претседателот на Република Српска Милорад Додик по средбата со српскиот претседател Александар Вучиќ во Белград.
Додик го одбил повикот од Обвинителството на БиХ да даде изјава како осомничен за уривање на уставниот поредок, зашто „Србите не одат на инквизиции“.
Тој ги обвини меѓународниот фактор и особено високиот претставник Кристијан Шмит, дека ја дестабилизирал БиХ: „Не можат да ја направат БиХ држава ниту од нас можат да направат Босанци“.
„Кога некој е во тешка позиција и во аголот, прави неразумни чекори. Во Сараево се радуваат на тоа и настојуваат Европа да ја искористат како тројански коњ, за да ја уништат Република Српска“, изјави Вучиќ.
