- Европската Унија ќе ги укине санкциите што му ги наметна на Косово во 2023 година и ќе му даде финансиска помош, најави претседателката на Европската комисија, Урсула фон дер Лејен.
- ЕУ воведе мерки против Косово откако владата на премиерот Албин Курти не ги послуша повиците од Брисел и Вашингтон да ги смири тензиите со српската заедница во северниот дел на земјата по локалните избори во 2023 година.
- Мерките опфаќаа замрзнување на економската помош и откажување на посети на европски функционери.
- „Добри вести за Косово. Издвојуваме програма од 216 милиони евра, од која ќе ослободиме 205 милиони во почетокот на идната година“, изјави Фон дер Лејен.
- Францускиот анестезиолог Фредерик Пеше е осуден на доживотен затвор поради намерно труење на 30 пациенти и убиство на 12.
- „Пеше не бил доктор, туку подмолен сериски убиец со лекови“, изјавија пред судот државните обвинители.
- Жртвите на анестезиологот, наречен Доктор Смрт, биле на возраст од 4 до 89 години. Им давал убиствени дози на парацетамол и други средства, за да предизвика срцев удар.
- Неговата најмлада жртва, четиригодишниот пациент Теди, претрпел два срцеви удари при рутинска операција на крајници. Детето било два дена во кома, но преживеало.
- Мотивите на Пеше биле различни. Со труењата и убиствата главно лечел лични фрустрации, настојувал да им ја урне репутацијата на колегите, но некои пациенти убил за да прикрие траги.
- Илјадници земјоделци од повеќе европски земји со трактори го блокираа Брисел, запалија барикади и божиќни елки, исфрлаа ѓубриво на улиците и ги замаваа полициските кордони со компири и јајца, во знак на протест против планот на ЕУ да го ратификува договорот за слободна трговија со Јужна Америка.
- Договорот, за кој се преговараше 25 години, предвидува укинување на увозните царини за речиси сите стоки помеѓу ЕУ и петте членки на блокот Меркосур - Бразил, Аргентина, Уругвај, Парагвај и Боливија во следните 15 години.
- Европските земјоделци тврдат дека договорот ќе ги уништи поради увоз на поевтино и понеквалитетни говедско месо, шеќер, ориз, соја, мед и други производи од Бразил и Аргентина.
- Претседателката на Европската комисија Урсула фон дер Лејен планира в сабота да отпатува во Бразил да го потпише договорот, иако се уште нема поддршка од потребното мнозинство во ЕУ.
- Францускиот претседател Емануел Макрон денеска изјави дека се уште не е спремен да го прифати договорот. Против се и Италија, Полска и Унгарија. Од друга страна се Германија, Шпанија и нордиските земји, кои имаат помалку развиени земјоделства и кои инсистираат на брзо потпишување на договорот.
