Вести › Набрзинка

Ердоган се враќа од САД со 225 авиони

26 септември 2025

Еден ден по средбата на претседателите Реџеп Таип Ердоган и Доналд Трамп во Белата куќа, националната авиокомпанија „Туркиш ерлајнс“ објави планови за купување 225 патнички авиони од „Боинг“.
Се одлучила за 75 авиони „787“ и ги завршила преговорите за купување на уште 150 од типот „737 max“. Испораката ја очекува во периодот од 2029 до 2034 година.
Трамп му ветил на Ердоган дека САД наскоро ќе ја укинат блокадата за продажба на напредни американски борбени авиони на Турција. За време на првиот мандат на Трамп, САД ја избриша Турција од листата земји на кои им беше понуден напредниот ловец „ф-35“ откако Анкара купи руски противвоздушен систем. Сега побарал од Ердоган Турција да престане да купува нафта и гас од Русија.
Откако Анкара лани прифати да го ратификува приемот на Шведска во НАТО, САД одобрија продажба на авиони „ф-16“ на Турција.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор