- Неидентификувани беспилотни летала биле забележани над воената база во Вашингтон во која живеат државниот секретар Марко Рубио и министерот за одбрана Пит Хегсет.
- Итно била засилена безбедноста на базата „Лесли Мекнер“ и бил свикан состанок во Белата куќа за да се разгледаат опциите за евентуално преместување на Рубио и Хегсет на друга локација.
- Базите „Мекгваер-Дикс-Лејкхарст“ во Њу Џерси и „Мекдил“ во Флорида пред неколку дена ја зголемија безбедноста на нивото „Чарли“, што значи дека има предупредувања од разузнавачки служби за можен напад или опасност. Највисокото ниво на тревога „Делта“ е кога се очекува напад.
- Форт Мекдил - дом на Централната команда, одговорна за воените операции на САД против Иран – во понеделникот била затворена неколку часа додека ФБИ истражувал сомнителен пакет, а во средата исто така имало тревога поради безбедносен инцидент.
- Стејт департментот во вторникот им нареди на сите американски дипломатски мисии низ светот веднаш да спроведат безбедносни проценки, поради „тековната ситуација на Блискиот Исток и потенцијалот прелевање на последици“.
- Иран формира нова дигитална платформа за осигурување „Ормуз сејф“, како ново владино тело за управување со бродскиот сообраќај низ Ормускиот проток. Платформата ќе се потпира на плаќања со криптовалути.
- Според планот на Министерството за економија, управувањето со теснецот преку рамка за осигурување би овозможило издавање на разни полиси за поморско осигурување, како и сертификати за финансиска одговорност, наместо да се наплаќа „патарина“. При идеални околности, ова би можело да генерира до 10 милијарди долари приходи за Техеран.
- Планот ќе почне со осигурување кое покрива инспекција, задржување и конфискација на бродови. Штетата од воени напади нема да биде покриена.
- „Овој модел би бил прифатлив за другите земји во мирно време, а сепак би му дозволил на Иран да врши контрола врз теснецот“, објави државната новинска агенција Фарс.
- Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
- Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
- „Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
- Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
- Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.
