Во време кога се разгорува прелистувањето на милионите документи за Џефри Епстин, претседателот Трамп најави отворање на досие на друга тема за која има „огромен интерес од јавноста“ - за вонземјани и неидентификувани летечки објекти.
„Врз основа на огромниот покажан интерес, ќе му наложам на секретарот за војна и на другите релевантни оддели и агенции да почнат процес на идентификување и објавување на владини досиеја поврзани со вонземен живот, неидентификувани воздушни феномени и летечки објекти, како и сите други информации поврзани со овие многу сложени, но исклучително интересни и важни прашања“, напиша американскиот претседател.
Поранешниот претседател Барак Обама пред неколку дена во подкаст изјави дека „постојат вонземјани“, но потоа разјасни дека мислел теоретски, а не дека бил воспоставен контакт со нив или дека ги има во тајни магацини во воената база Област 51 во Невада. „Статистички, универзумот е толку огромен што има големи шанси дека таму некаде има живот“.
Трамп изјави дека со оваа изјава Обама споделил „доверливи информации достапни само за претседателот“.
Пентагон по Втората светска војна истражува извештаи за НЛО и вонземјани. Високи офицери во 2022 година објавија дека досега немало никаков доказ за контакт со вонземна технологија, но за многу случаи немаат прифатливо објаснување.
Иран формира нова дигитална платформа за осигурување „Ормуз сејф“, како ново владино тело за управување со бродскиот сообраќај низ Ормускиот проток. Платформата ќе се потпира на плаќања со криптовалути.
Според планот на Министерството за економија, управувањето со теснецот преку рамка за осигурување би овозможило издавање на разни полиси за поморско осигурување, како и сертификати за финансиска одговорност, наместо да се наплаќа „патарина“. При идеални околности, ова би можело да генерира до 10 милијарди долари приходи за Техеран.
Планот ќе почне со осигурување кое покрива инспекција, задржување и конфискација на бродови. Штетата од воени напади нема да биде покриена.
„Овој модел би бил прифатлив за другите земји во мирно време, а сепак би му дозволил на Иран да врши контрола врз теснецот“, објави државната новинска агенција Фарс.
Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
„Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.
