За измама и перење пари во предметот „Меѓународен сојуз“, Бојан Јовановски е осуден на единствена казна од 9 години.
Таткото на Бојан е осуден на две годишна условна казна (ако пет години не направи беља), потпреседателката на Сојузот Јасна Мандиќ Ерцеговиќ е осудена на 4 години затвор а Фросина Ременски доби ослободителна пресуда бидејќи обвинителството не успеало да ја докаже вината.
Обвинетите се задолжени солидарно да им ја надоместат штетата на фирмите на Силјан Мицески и Адријан Амзоски кои на Јовановски преку Македонска авторска агенција му исплатиле 719.905 евра, односно 233.821 евра.
На 31 декември ќе биде прекинато емитувањето на пет канали канали на музичката телевизија MTV во Европа и Британија - MTV Music, MTV 80s, MTV 90s, Club MTV и MTV Live. Тие имаа стабилна, но мала гледаност од околу 1 милион луѓе. Ќе остане само главниот канал MTV HD, кој од целодневно прикажување спотови премина на реалити програми.
Сопственикот Парамаунт планира да ги намали трошоците и загубите. Ќе ја задржи продукцијата на својата услуга за стриминг Paramount+ и ќе продолжи да ги доделува годишните награди, но ги откажа MTV Awards за Европа.
MTV почна да емитува програма во 1981 година, а во 1987 се прошири низ Европа со национални и регионални канали. Главниот канал целосно се откажа од емитување спотови во 2011 година.
Телевизијата што во раните 80-ти поттикна нова ера во поп-рок музиката, отвори индустрија на видео-спотови и создаде глобални ѕвезди, губи од релевантноста, бидејќи публиката мигрираше кон дигиталните платформи за видеа, како Јутјуб.
Генерациите што израснаа со MTV знаат кој беше првиот спот објавен на телевизијата. На снимкава го има и вториот.
Џоел Мокир, Филип Агион и Питер Ховит се добитници на Нобеловата награда за економија за 2025 година, поради објаснувањето како иновациите управуваат со економскиот раст, објави шведската Кралска академија на науките.
Една половина од наградата ќе му припадне на Мокир поради „идентификување на предусловите за одржлив раст преку технолошки напредок“.
„Тој покажа дека не само што треба да знаеме дека нешто функционира, туку треба да имаме и научни објаснувања зошто. Второто честопати недостасува пред индустриските револуција, што го отежнува растот врз основа на нови откритија и пронајдоци“, објави академијата.
Другата половина ќе ја поделат Агион и Ховит „за теоријата за одржлив раст преку креативно уништување“. Во студија од 1992 година тие конструирале математички модел за загубите што ги трпат компаниите кога на пазарот ќе влезе нов и подобар производ.
„Лауреатите покажаа како „креативното уништување“ создава конфликти кои мора да се управуваат на конструктивен начин. Во спротивно, иновациите ќе бидат блокирани од веќе етаблирани компании и групи на кои им се загрозени интересите“, објави академијата.
