Вести › Набрзинка

ЦИА со видео на Јутјуб регрутира кинески шпиони

14 февруари 2026

ЦИА на својот канал на Јутјуб објави ново видео што треба да привлече разочарани кинески војници да соработуваат за САД.
На снимката на мандарински јазик е прикажан кинески офицер што решил да контактира со ЦИА и порачува: „Ова е светот што го познавам, одбрана на татковината и заштита на народот. Но, вистината станува сè поочигледна: лидерите го штитат личниот интерес. Не можев да дозволам лудилото на лидерите да биде иднината на мојата ќерка“.

Ова е петтиот видео-оглас на ЦИА на мандарински јазик за регрутирање кинески шпиони по октомври 2024 година. Директорот Џон Ратклиф вели дека видеата стигнале до многу кинески граѓани, и покрај фактот што во Кина им е блокиран пристапот до Јутјуб.
На оваа тактика, Кинезите лани возвратија со видео во сличен формат во кое се подбиваат со животот во САД и ги предупредуваат Американците дека „нивните лидери се корумпирани, а елитата од Волстрит манипулира со финансиите“.

извор

Администрацијата на Трамп го тужи Харвард

14 февруари 2026

Министерството за правда поднесе тужба против Универзитетот Харвард за непочитување на истрагата за правила за прием на студенти.
Администрацијата тврди дека институцијата крие информации за тоа дали има расно дискриминирачки критериуми и после значајната одлука на Врховниот суд кој забрани расата да иима влијание врз бодувањето и приемот.
Харвард наводно одбил да предаде евиденција за примени студенти и кандидати. Според обвинителот, ако Харвард имаше престанато да дискриминира одредени раси (белците - н.з.), со задоволство ќе ги предадеше бараните документи.
Администрацијата на Трамп се обиде да замрзне милијарди долари во федерални истражувачки грантови и договори, како дел од својата борба против антисемитизмот на кампусот на Харвард. Кога факултетот пружи отпор, Трамп се фати за можноста Харвард да запишува странски студенти и се закани со укинување на статусот за ослободеност од данок.
Паралелно со сето ова, Трамп прво бараше 500 милиони па после една милијарда долари за решавање на неколку истраги за граѓански права против факултетот.

извор

Мерц повика на трансатлантско партнерство базирано врз интереси

14 февруари 2026

Германскиот канцелар Фридрих Мерц повика на ново партнерство на САД и Европа, врз основа на заедничките интереси, а не на вредностите што повеќе не ги споделуваат.
„Трансатлантското партнерство ја изгуби својата самодоверба, прво во САД, потоа тука во Европа, а веројатно и во оваа просторија... Културните војни на движењето МАГА не се наши. Слободата на говорот завршува кога се користи за напад за човечкото достоинство и за Уставот. Не веруваме во царини и протекционизам, туку во слободна трговија“, порача Мерц.
Тој оцени дека САД ги достигнаа границите на својата моќ да дејствуваат самостојно и ја изгубија улогата на глобален лидер во новиот светски поредок , предупреди германскиот канцелар Фридрих Мерц, на отворањето на Минхенската безбедносна конференција.
„Овој поредок, колку и да беше несовршен дури и во својот најдобар период, повеќе не постои во таа форма. Во ерата на соперништво меѓу големите сили, дури ни САД нема да бидат доволно моќни да дејствуваат сами... Затоа, ајде заедно да ја поправиме и оживееме трансатлантската доверба“, изјави Мерц.

извор