Вести › Набрзинка

Бугарска опозиција: Може да дојде до граѓанска војна

11 декември 2025

Лидерот на опозициската партија МЕЧ, Радостин Василев, предупреди дека во Бугарија може да избувне граѓанска војна, ако шефовите на владејачката гарнитура Делјан Пеевски и Бојко Борисов арогантно ги отфрлаат повиците за оставка на владата.
Повеќе од 150.000 луѓе синоќа демонстрираа низ Бугарија и бараа оставка од владата на Росен Жељазков. Во центарот на Софија излегле над 100.000 луѓе на најмасовните протести по 1990-ите години, кога се смени комунистичката гарнитура.

Масовните демонстрации низ Бугарија почнаа како протест на предлог-буџетот и прифаќањето на еврото, но продолжија и откако владата го повлече предлогот. Бугарите сега бараат нова влада со поголема одговорност, вистинска борба против корупцијата и раскинување на врските со заткулисните моќници и олигарси.
Оставка од владата побара и претседателот Румен Радев.
„Владата мора да падне. Мора да се среди буџетот. Ова мора да се случи. Не смее повеќе да не заслепуваат“, барале демонстрантите.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор