- Тројца британски војници кои учествуваа на воената вежба вои Криволак искршија ресторан во Неготино и нападнаа полицаец.
- Четворица други украле такси возило во Скопје и после со него се учукале во банкина во Гази Баба.
- Ни во едниот ни во другиот случај против нив нема да биде поднесена пријава бидејќи таков е договорот со НАТО.
- Премиерот и претседател на ВМРО-ДПМНЕ, Христијан Мицкоски, на партискиот конгрес во Кавадарци едногласно беше реизбран за партиски лидер. Од присутни 817 делегати, гласале 804 и сите гласови биле „за“ Мицкоски, кој беше единствен кандидат.
- Тој се осврна и на спорот со Бугарија. Имаме отворено прашање со нашиот источен сосед, но се чини дека нема соговорник од другата страна, кажа Мицкоски. Тој вели дека нема намера да отстапи ниту милиметар од позициите во однос на спорот, но од друга страна пак, посочи дека е подготвен за разговори, но единствено во присуство на евродипломати, во Брисел.
- Мицкоски застана на челната позиција во партијата во 2017 година, по Никола Груевски. Ова е негов трет и според партискиот Статут, последен мандат како претседател на ВМРО-ДПМНЕ.
- „Мојот наследник на ВМРО-ДПМНЕ нема да биде човек што само победува во анкети, или што знае да аплаудира. Тоа ќе биде човек со ’рбет, со интегритет, со дисциплина и фокус. Ќе биде човек што знае да ја носи тежината на државата. Што знае да издржи. Што знае да прости. Што знае да биде чесен и кога боли и кога сите се откажуваат од него затоа што во моментот им е така опортуно да прават. Наследникот мора да биде човек што ќе знае дека партијата е поголема од него, а не човек што мисли дека е поголем од партијата“, рекол Мицкоски.
- Кристин Лагард објасни дека Европската централна банка од правни, а не политички причини, не ја поддржува употребата на замрзнатите средства на Русија во ЕУ заради финансирање на Украина. Лагард истакнува дека ЕЦБ ќе направи сè што може за да му помогне на Киев, сè додека не се прекршуваат договори.
- „ЕЦБ не може да обезбеди директно финансирање на компании или институции, ниту пак може да дејствува како гарант за владите. Не можеме да ги заобиколиме договорите и мандатот за финансиска стабилност“, објасни Лагард на сослушувањето во Комитетот за економски и монетарни прашања на Европскиот парламент.
- Европската банка претходно ја отфрли идејата за заеми за Киев преку руски средства замрзнати на територијата на ЕУ, опцијата број еден на Европската комисија за да ги задоволи финансиските потреби на Киев, чија државна каса веројатно ќе биде празна до следната пролет.
