Вести › Набрзинка

Британија ќе мобилизира резервисти до 65 години

16 јануари 2026

За да ги зајакне резервните воени сили, Британија ја зголемува на 65 години максималната возраст на поранешните војници што може да бидат повикани во строј. Стратегискиот резервен состав досега беше ограничен на возраст до 55 години.
Новите правила би требало да стапат на сила од идната година.
Новиот закон за оружени сили ги олеснува и критериумите за мобилизирање резервисти. Според сегашните правила, тие може да бидат повикани во случаи на „национална закана, вонредна ситуација или напад врз Британија“. Новиот услов ќе биде „подготовки за воени дејства“, кој сега важи за војниците и офицерите што го напуштиле воениот состав во изминатите пет години.
„Мора активно да се подготвиме за можноста Британија да биде под директна закана, потенцијално во воено сценарио“, изјави министерот Пат Мекфаден пред пратениците. Тој ја посочи војната во Украина како „најочигледен и најитен пример“.
Планот на лабуристичката влада е да ги зголеми трошоците за одбрана од 2,3% на 2,5% од БДП до 2027 година, што ќе чини 6 милијарди фунти. Премиерот Кир Стармер го прифати условот од Трамп и вети дека Британија до 2035 година ќе троши за одбраната 5% од БДП.

извор

Армија од 11.000 административци ќе добијат 40% поголеми плати

8 февруари 2026

Околу 11.000 административци ќе земат покачување на платите од скоро 40 отсто до 2028 година.
Тоа во следните три години ќе чини дополнителни десет милиони евра годишно, но „со реорганизација и редефинирање на приоритетите во Буџетот“ - можело.
Претседателот на Синдикатот на администрацијата, државната управа и правосудството оцени дека се постигнала историска придобивка за вработените во админстрацијата.

* На фотографијата: Ние додека чекаме вест дека конечно ќе се почне со намалување на непродуктивните вработувања во администрацијата.

извор

Трамп ќе пуштел пари ако именуваат аеродром по него

8 февруари 2026

Претседателот Доналд Трамп ќе ја дигнел рампата за пар милијарди наменети за Њујорк под еден услов - да се додаде неговото име на неколку знаменитости.
Му рекол на лидерот на демократите во Сенатот, Чак Шумер, дека е спремен да се откаже од задржувањето на 16 милијарди долари за долгопланираниот железнички проект што ги поврзува Њујорк и Њу Џерси под реката Хадсон.
Услов бил Меѓународниот аеродром Вашингтон (кој се наоѓа во Вирџинија) и станицата Пен во Њујорк бидат преименувани по него.
Според CNN, Шумер веднаш ја одбил понудата.
И Њу Џерси и Њујорк ја тужат администрацијата на Трамп поради застојот во финансирањето, што е дел од нејзиниот модел да ги задржува парите од Конгресот за државите кои не гласаа за Трамп на изборите во 2024 година.
Администрацијата држи уште 8 милијарди долари во проекти за чиста енергија во 18 „демократски“ држави.

извор