- Австрија се подготвува да ги отвори електраните на јаглен што ги затвори во 2020 како дел од својата зелена агенда.
- Официјално не се откажуваат од зелената агенда, ама официјално и не сакаат да измрзнат зимава ако Русија целосно го секне гасот, па колку толку потрошувачката на електрична енергија да ја покријат со старите електрани.
- Освен Австрија слични мерки најавија и Германија и Франција, што сериозно го нарушува планот на ЕУ за намалување на загадувањето со штетни гасови за барем 55% до 2030.
- Дури 89% од возрасните Американци сметаат дека корупцијата во владата е широко распространета, според ново истражување на агенцијата „Галуп“. Тоа е пораст од 10% во однос на лани и далеку над просекот од 72% до 79% во периодот од 2010 и 2025 година.
- Перцепцијата кај демократските гласачи за владината корупција бележи најголем пораст од 57% на 91%, а меѓу републиканците е стабилизирана на натпросечно високи 83%.
- Сè уште нема целосни анализи на новите анкети на Галуп спроведени во 38-те земји од ОЕЦД, но се очекува САД да бидат на врвот. Просекот во ОЕЦД лани бил 59%, што е пад за 10 процентни поени од 2009 година.
- Од 2023 година, кога почнаа глобалните истражувања на Галуп, само четири од вкупно 132 земји имале повисок процент на перцепирана корупција од САД денес – 92% во Либан во 2024 и во Перу во 2025 година, и 90% во Гана и во Нигерија во 2024 година.
- Впечатливо за САД, за разлика од повеќето други земји, е што граѓаните немаат изедначен став за корупцијата во владата и во бизнисот. Додека 89% сметаат дека е присутна во владините институции, 71% ја чувствуваат во бизнисот, за 8% повеќе отколку лани.
- Русија и Северна Кореја денеска првпат се поврзаа со мост за коли и камиони, како „нов чекор кон стратешкото партнерство“.
- Русија има копнена граница од 17 километри со Северна Кореја (најкратката од сите 14 копнени соседи), по течението на реката Тумен. По Корејската војна, во 1959 година двете земји се поврзаа преку Мостот на пријателството, кој беше отворен само за железнички транспорт.
- Рускиот премиер Михаил Мишустин изрази надеж дека новиот мост за возила ќе поттикне развој на трговската, научната и културната соработка и ќе отвори нови работни места.
- Мостот долг 1 километар го носи името на Јаков Новиченко – офицер од Црвената армија, кој со своето тело му го спасил животот на севернокорејскиот лидер Ким Ил Сунг од обид за атентат во 1946 година. „Запорожецот“ на Новиченко, управуван од неговиот внук, беше првата кола што го премина мостот.
