Тоа јутјубот и нетфликсот со нивните кулинарски шоуа драстично ја заразија јавноста со 'фајн-дајнинг' и мишелински ѕвезди. Oдеднаш сите почнавме да аранжираме чинии со листови од коприви, качунки, глуварче, лошо избланширани моркови, точки од кечап, лушпи од сончоглед итн. Углавном, супер неумешно. Елитните кујни каде што служат храна по курсови знаат да бидат апокалиптично преценети, но има и шефови кои без сомнение ја заслужуваат титулата „уметник“. Генерално тоа се ресторани за сити луѓе. Таму не одиш за да се најадеш, одиш за да доживуваш. Секој шеф ја има слободата да експериментира со вкусови, стилови, садови, амбиент. Сето тоа кулминираше со молекуларната кујна. Гуглајте ако сакате да откриете нешто повеќе.Рибата и „необичните“ зеленчуци се редовно на листата во менијата на овие ресторани. 90% ја служат жива/сирова, на што јас лично воопшто не сум фан. Исто и меснатите „тартаре“ рецепти ми се крајно језиви. Пробав, не е мое чоканче ракија. Или шолја чај, како сакате.
Денес спремаме лосос и пире од целер. Лососот е Блек Сабат меѓу рибите. Тешка класика. Целерот е доста непопуларен коренаст зеленчук за наше поднебје. Како зачин се користи, но свеж освен стеблото чат-пат, скоро ич. За коренот и да не правиме муабет. Денес ќе подготвиме пире токму од коренот. Мене ми е супер додаток за со месо. Следното што ќе го прочитате е првоодделенски ресторански трик. Јас само додавам и одземам моменти кои нијансираат.
Епа ајмо возрасни експерти, спремаме милионерска вечера за ситни пари:
Тенџере полно вода. Да врие како веган у Лесковац. Коренот целер го лупиме и сецкаме на коцки. Го вариме едно 20 минути. Во водата цедиме еден лимон. Не прашувајте, зашто, врвна тајна е. Кога е веќе сварен, го префрламе во блендер. Зачинуваме со сол и бибер. Пред да блендираме му додаваме 50 грама путер. Масакрираме. Пирето е готово.
Напомена: ако сакате фино измалтеришано пире, поминете го низ цедалка, затоа што само изблендирано остануваат мали грутки затоа што е таква текстурата на самиот плод. Мене ми беа симпатични и ги оставив. Даваат ефект на облаче кога се сервира.
Рибата: парче 250 грама. Со кожа. Кожата е круцијална. Има да крцка како дедин кук. Ова е мојот омилен начин за спремање лосос на тава: јак оган, минута време со кожата надолу, намалуваме на скроз тивко и ја вртиме на меснатата страна уште 8-10 минути. Вака останува мек, свеж, крцкав и полн со вкусови. Пред пржење го зачинуваме со бибер и сол.
Како да сервирате? Вака: Две полни лажици пире, врз него неколку капери и ситно сецкани роквици. Благословуваме со маслиново. Врз оваа мека перница го поставуваме крцкавиот лосос. Видете, можда Ремзи ќе најде тука 200 маани, ама он нема право на збор пошто веројатно не пробал пинџур, расолница и жетварка.
На здравје елитисти,
Кирил Стоименов - бишелинска петокрака
