Како што е ѓувечот за веганите, така е дивечот за оние кои биле доволно гушкани како мали. Се шалам, диетата, религијата и членската книшка се интимни ствари. За невкусови не се расправа. Башка ние овде расправаме стрикно за вкусови.
Дивечот е кафанскиот дефинирач на социо-економскиот статус на нарачувачите. Од мал ми е останато траума дека скороевичи кога нарачуваа дивеч по крчмите низ Осогово, урлаа приматски за цела кафана да ги чуе. Класичен крупен дивеч у патики. Порано дивечот се ловел пушка, лак и стрела или слично оружје. Денес се лови со браник од кола. Многу често кога ќе сретнете друштво во кафана што се слади со дивеч, знајте дека софрата чини колку еден лев фар, крило и браник.
Постојат мал милион марифети за премање на дивеч. Некои го одлежуваат во млеко цела вечер, некои во оцет, други прават коктели со сода бикарбона и слични народни лекови за избавување од стомачни киселини. Трети го печат на путер како оние скапите парчиња јунешк
А мојата Александар маленкост го спрема вака: Килограм дивеч по избор: може да биде елен, срна, зајак, дива свиња, фазан итн. Јас имам кило срна. Извини Бамби. Ќе го комбинираме со разни подземни зеленчуци и ќе го парфимираме со неколку свежи билки.
Стартуваме со месото. Го сецкаме на коцки со страна од околу 2 сантиметри. Го зачинуваме со сол, црн пипер и вегета. Го лубрицираме со маслиново масло. Нека отстои пола саат за да ги абсорбира зачините.
На зеленчуковиот фронт имаме: кромид, лук, праз, морков, пашканат и шалган (а.к.а. зимско јаболко; европјаните го викаат ерусалимска артичока, боже ме сачувај). Сиот зеленчук го средуваме на мали коцкички.
Перцата од празот ги чуваме за следниот трик: Во нив сместуваме букет свеж рузмарин и жалфија. Правиме два-три вакви и ги врзуваме со кујнски конец.
Во длабок лонец го пропржуваме дивечот едно 5-6 минути, додека месото не потемни. За момент на страна.
Втора рунда: ги карамелизираме зеленчуците. Сериозно посолуваме. Нека се пропржат околу седум-осум минути. Потоа го враќаме и месото, заедно со литар црвено вино и пола литар говедски бујон (растворена коцка за готвење во пола литар врела вода). Промешуваме и на врв ги додаваме букетите од праз и свежи билки. Држиме на умерен оган сè додека не почне да врие. Потоа стишуваме на тивок оган и динстаме три ипол часа, во најмала рака. На секој час отвараме капак и промешуваме.
Кога дивечот е видно расположен затоа што го попил целото винце, финишираме со многу ситно сецкан магдонос.
Испочитувајте ги овие динст-инструкции и немате утка ниту промашај. Месото се топи во уста како локум, зеленчукот не дозволил џусовите да испарат, а билките со своите магични ноти свират апетито-пробудителна соната.
На здравје.
Кирил Стоименов - притом, питом
