Не е проблем што женава ангажира гатачка по препорака од интернет форум, ниту тоа што верува дека таа со праќање пасоси од Куранот на арапски ќе и го врати бившиот, веројатно не е ни тоа што ја заклале за 150 евра. Проблем е што кога некој ќе ти каже дека магичниот лист што ти го пратил треба да го чуваш 40 дена под перница, па да го закопаш, и дека тоа далечински ќе му ги прочисти емоциите на саканиот и ќе го натера да ти се врати, на тебе целата работа ти станува матна кога текстот што ти го пратиле не ти е доволно арапски, па се сомневаш дека нема да фати кај тебе. Проблем е и тоа што секој што решавал магии во Србија, кај да е ќе се симне и во Македонија (или барем ќе гостува).

Како што Фејсбук одлучи да тргне во поход по видео содржини и сите можни алгоритми да ги наштелува во корист на видеата објавени кај нив (си го мерат со Јутјуб), така луѓето што прават видеа од ден на ден стануваат се погневни гледајќи како на очиглед на Фејсбук луѓе им ги крадат видеата и заработуваат (поточно со Фејсбук делат) пари од нивен труд. Во ноември Фејсбук објави дека имаат 8 милијарди видео прегледи на ден. Ништо не е така како што вели Фејсбук.

Ние толку се имаме изнаслушано за зиберчиња, фокусчиња, светленца, блендички и слични фотографски аксесорис, што треба бенифициран стаж да ни уплатат од Фотографски сојуз на Македонија или кој и да е надлежен. Ова е за оние кои биле поштедени од вакви предавања.

Клип кој ќе ве натера да го засакате родениот брат, или барем на кратко да помислите на него. Реклама за Џони Вокер која е чисто студентски проект на двајца студенти од Филмската академија Баден-Вуртемберг, без никакво знаење или консултација од Џони Вокер. Живели брат!

За витамините од кутија и некои многу, ама многу, лоши муабети за витаминот Ц, баш сега сред сезона.

Несакајќи, најдобриот експеримент што Митбастерс никогаш не го направија: огнофрлач вс. пожарникарско црево.

Ако ова чувство не сте го имале од понеделник наутро до петок (или сабота) попладне, тогаш ништо.

Најдобрите 25 филмови во избор на Дејвид Ехрилх од Ролинг Стоун магазин (што не значи дека изборот е на Ролинг стоун магазинот). Ова му е 4-та година по ред како го прави ова.

Една од сериозните заблуди околу желбата сите да возиме точаци, е дека кога ќе ги поразиме возачите на коли / мотори и ќе добиеме наша лента, ќе можеме што сакаме да правиме на точак и ќе живееме во една прекрасна хипи комуна на две тркала во која во сообраќајот ќе се шири само љубов. Секој што развил тикови кога пробал на точак да го разгледува Амстердам или Копенхаген, ќе ви каже дека тоа не е ни приближно така анархично и лесно. Холанѓанецов ќе ве запознае со основните велосипедски правила за Амстердам.

И БиСиСи, и Руперт Мердок, и тој колегата во студио, ма сите... Џонатан Пај со обраќање до сите овие, за најголемиот страв на секој репортер, за пропаста на БиБиСи и британското општество и сè по ред.

На стариот му остануваат уште 9 дена додека да тргне во својата годишна обиколка. Кога ќе тргне, Гугл планира да го следи во чекор (или лет). До тогаш за чекањето да не биде монотоно, Гугл имаат цела занимална за вас.

Парадоксите на филмот веќе ги наброивме во статијата: "Објаснување за крајот на Интерстелар, што ќе ве натера пак да го гледате Интерстелар". А видеото кое следи објаснува зошто за следното гледање треба да купите две карти. 

Кај треба да се вози со автобус, па уште и вас да ве слуша. Не е јасно што е спорот со хармоникашите, тоа што се "цигани," тоа што свират хармоника или што ги доживува како да се облекуваат похипстерски од него?

Почетната точка за која сите се согласуваме е дека никој не го разбра крајот на Интерстелар, затоа што 5-димензионален простор не е нешто што е за разбирање. Ова е обид да ни се објасни крајот. (Ако некој ти го објаснува крајот на филмот, многу е логично дека ќе има спојлери.)

Од една страна е портпаролот на американскиот Стејт Департмент, од друга, новинарка на Раша Тудеј. Борбата може да започне.

Кога ќе купиш добар фото-апарат, тоа не те прави фотограф. Тоа те прави сопственик на добар фото-апарат.

Како новинар можеш да бидеш сигурен дека без разлика колку си добар во тоа што го работиш, многу повеќе луѓе ќе ти го памтат тоа што си го згрешил додека работиш, посебно на телевизија. Компилација од новинарски блупери за 2015-та.

Само овие десет клипа годинава имаат вкупно 470 милиони прегледи. Посебно важно за интернет историјата е што две третини од овие 470 милиони прегледи се од мобилен уред, во истата година кога Јутјуб за прв пат во свoето постоење има повеќе прегледи од мобилни уреди, отколку од десктоп / лаптоп компјутери.

Затоа што нешто е 3 долари на Али Експрес не значи дека треба да го купиш или дека како било ти е потребно. Ќе го купиш, ама не значи дека треба.

... Не сум му фан на Саша Барон Коен... неговите ликови се многу навредливи, Али Џи, Бруно, и овој новиов, Доналд Трамп...

Неколку моменти што треба да се внимаваат, околу клипов: цигарата, тресење на цигарата на тепих, Jesus Christ. Инаку за вежбање трицепс за маса треба да се знае: то је килажа, то су мишичи, то је снага.

Нема да ви треба многу објаснување за тоа кој е кој во ова видео. Министерот ќе го познаете по професионалноста и умешноста а себе ќе се препознаете по - смислата за хумор.

Boogie2988 е еден Јутјуб лик со речиси 3 милиони следбеници на својот канал, кој генерално расправа видео игри, ама фаќа и други теми. Инаку Буги е дебел, околу 140 килограми дебел, и до пред некое време помирен дека како таков и ќе умре. Не дека не пробувал да ослабе, ама генерално не му успевало. Еден од тренерите со кои се обидувал да ослабе, деновиве му праќа линк од Јутјуб.