Вести › Набрзинка

Нови траги дека имало живот на Марс

11 September 2025

Дамки на карпи на Марс содржат досега најсилен, но не и конечен доказ дека многу одамна имало живот на најблиската планета до Земјата, објави НАСА.
Научниците цела година барале друго објаснување за потеклото на шарените дамки, кои лани ги открил роверот Perseverance во кратерот Језеро, и заклучиле дека немало друг начин да бидат формирани освен како „траги од живот“.
„На карпите има наслаги од железно-фосфатен вивијанит и железно-сулфиден грејгит. Се чини дека овие минерали се формирани со реакции помеѓу калта и органска материја кратко време по седиментацијата„, објаснува д-р Џоел Хуровиц, геохемичар од њујоршкиот Универзитет Стони Брук и прв автор на студијата.
Тој истакнува дека ова е само „потенцијален“ биосигнал, се додека не биде утврдено дали слични реакции може да се предизвикаат со хемиски процеси без биологија. Конечен одговор е можен само со лабораториски анализи на примероци вратени на Земјата, а НАСА засега нема такви планови.

извор

Од 12 октомври во ЕУ со отпечаток од прст и фотографија

11 September 2025

Граѓаните од Македонија и од други земји што имаат безвизен режим со ЕУ, од 12 октомври ќе треба да оставаат отпечатоци од прст и фотографија при влез во членки на Шенген зоната. Биометриските податоци ќе ги оставаат само при првиот влез, а при секој нареден само ќе им се потврдуваат податоците. Мерката нема да важи за деца до 12 години.
Регистрирањето ќе се спроведува во фази. Во првите 30 дена треба да бидат опфатени 10% од сите патници што влегуваат во Шенген, за 90 дена 35%, за 150 дена една половина, а по 170 дена се предвидува да бидат опфатени сите патници.
На копнените граници на Македонија со Грција и Бугарија на почетокот нема да се регистрираат сите патници, за да не се прави метеж. Патниците ќе мора да излегуваат од автомобилите, а за автобусите се размислува граничен службеник да влегува со мобилен апарат за земање отпечатоци.
„Сакаме да знаеме кој влегува и кој е во Шенген зоната, да се идентификуваат луѓето што влегуваат за да се намалат измамите со идентитет, но и да се намалат злоупотребите со пречекорување на 90-дневната дозвола за престој“, објави Делегацијата на ЕУ во Македонија.
Овој систем ќе функционира одвоено и паралелно со ЕТИАС, кој од крајот на 2026 година налага онлајн регистрирање за да се овласти патување во Европа во рок од три години. Цената на ваквата „дозвола“ за влез во ЕУ би чинела 20 евра, а ќе биде бесплатна за лицата под 18 години и над 70 години.

извор

Разрешен британскиот амбасадор во САД близок до Епстин

11 September 2025

Премиерот Кир Стармер го разреши британскиот амбасадор во САД, Питер Менделсон, поради блискоста со педофилот Џефри Епстин.
Форин офисот објасни дека Менделсон кога бил поставен за амбасадор не открил колку е широко и длабоко неговото пријателство со Епстин. Властите не знаеле за е-пораките од Менделсон до Епстин во кои ја оспорил и ја оценил како неправедна неговата пресуда од 2008 година за ангажирање деца за проституција.
„Сугестијата на Менделсон дека првата пресуда на Џефри Епстин била неправедна и треба да се оспори е нова информација. Имајќи ги предвид жртвите на злосторствата, амбасадорот е повлечен од функцијата со итен ефект“, соопшти претставник на Министерството за надворешни на Британија.
Неколку часа по објавувањето на пораките, Менделсон призна дека веројатно ќе се појават повеќе „многу срамни“ детали за неговото пријателство со Епстин, но инсистира дека никогаш не бил сведок на никаков прекршок.
Питер Менделсон е искусен британски дипломат, кој беше на разни министерски позиции во владините кабинети на лабуристичките премиери Тони Блер и Гордон Браун. За амбасадор во САД беше поставен од Стармер во февруари годинава.

извор