Вести › Набрзинка

Кокаинските линии уриваат рекорди

27 June 2025

Глобалната нелегална трговија со кокаин достигнала рекордно високо ниво во 2023 година, главно поради експанзијата на нелегалните плантажи на кока во Колумбија, покажува новиот извештај на Канцеларијата на ОН за дроги и криминал.
Во 2023 година биле произведени 3.708 тони кокаин, што е речиси десет пати повеќе во споредба со „најслабата“ година во изминатата деценија.
Во Колумбија се одгледани над 67% од вкупното количество кока, главно во јужните предели контролирани од остатоци од расформираните левичарски герилски групи како ФАРК.
Зголемена е и побарувачката во светот. Во 2023 година приближно 25 милиони луѓе користеле кокаин, во споредба со 17 милиони пред една деценија. Главните пазари за кокаинот од Колумбија, Перу и Боливија се Северна Америка, Западна и Централна Европа и Латинска Америка.
Со бродови се шверцува до САД, Бразил, Венецуела, Мексико и Јамајка, а главните јазли за авионски пратки се во Венецуела.

извор

Мирните протести во Србија финишираа со инциденти

28 June 2025

На Славија во Белград денеска се одржаа масовни протести на кои повикаа „студентите во блокада“ на белградскиот Универзитет чие главно барање сега е да се распишат вонредни избори.

По завршувањето на официјалната програма на собирот на кој на собраните граѓани им се обратија неколкумина говорници, меѓу кои ректорот Владан Ѓокиќ, кошаркарската легенда Дејан Бодирога и други, дел од народот се разотиде но еден дел од луѓето се обидоа да дојдат до Пионерскиот парк кадешто се наоѓаат „студентите кои сакаат да учат“, при што дојде до вербални пресметки и кошкање со полицијата.

Денешниот Видовденски протест на кој власта беше „прогласена“ за нелегитимна, беше помалку посетен од импресивните протести на 15 март (види: Белград полн, преполн).
Претходно, токму од фамозниот Ќациленд, Александар Вучиќ порача дека студентите веќе победиле а блокадерите изгубиле.
И опозиционите кругови и Вучиќ најавуваа дека по завршувањето на протестот може да дојде до насилства.

Како и во сите слични острастени ситуации, најгласни се идиотите кои сите што нема да им се придружат, ги прогласуваат за непријатели.

извор

Повлечена е номинацијата на Доналд Трамп за Нобелова за мир

28 June 2025

Украинскиот парламентарец ја повлече својата номинација на американскиот претседател за Нобелова награда за мир, која ја поднесе минатиот ноември.
Олександр Мережко, шеф на украинскиот парламентарен комитет за надворешни работи вели дека „изгубил секаков вид верба и надеж“ во Трамп и неговата способност да постигне договор за прекин на огнот меѓу Русија и Украина.
Нобеловата награда за мир одамна е комромитирана титула. Ја имаат добиено Хенри Кисинџер (види: (Донт) Кил Кисинџер) и Барак Обама, и тоа само неколку месеци по стапувањето на функцијата, без никакви конкретни постигнувања во мировните процеси

извор