20-годишна девојка од Хамбург е испратена зад решетки откако упатила „говор на омраза“ кон мигрант кој бил вмешан во групно силување на девојче. Таа е само една од 140-те лица кои се под истрага за објавување „штетни и навредливи коментари“ кон силувачите.
Ужасниот напад се случил во 2020 година и вклучувал повеќе групи мигранти кои ноќно време во Штадпарк во Хамбург последователно нападнале 14-годишно девојче. Паркот во тоа време бил популарно место за дружење за младите за време на ковид карантините а девојката била таму со пријатели. Друштвото се распрснало откако полицијата упаднала во паркот разбивајќи ги групите заради спроведување на мерките за социјално дистанцирање.
Збунето и само, девојчето било немоќно пред првата толпа од четворица предатори. Мажите наизменично ја силувале. Пред да ја остават, ѝ го земале паричникот и мобилниот телефон. Трауматизирана и дезориентирана од првиот напад а немајќи начин да повика помош, девојчето по втор пат било нападнато од уште двајца мажи кои ја злоупотребиле нејзината ранлива состојба.
Во меѓувреме, некој од оние првите, преку нивните чет групи почнале да покануваат други мажи на силување, радосно споделувајќи ја веста дека во темниот парк има беспомошна тинејџерка а нема потенцијални сведоци.
Девојчето и третпат било нападнато од самец, а потоа и четврти пат од уште тројца мажи, кои ја одвлекле во грмушки и ја силувале. Конечно, успеала да им избега иако овие ја бркале за на крај да наиде на луѓе кои ја препознале ургентноста на состојбата и повикале полиција.
Првично биле обвинети вкупно 11 мажи, но двајца биле ослободени поради недостаток на ДНК докази. Во девојчето била најдена сперма од девет мажи.
Петмина од мажите поседувале германски пасоши, додека останатите не биле државјани на Германија. Меѓу обвинетите, никој не бил со германско потекло. Силувачите се идентификувани лица од Египет, Либија, Кувајт, Иран, имало и Полјак, Ерменец, Авганистанец, Сириец и Црногорец.
Видеа од првото и третото силување биле снимени и споделени од напаѓачите преку WhatsApp, но видеата биле избришани пред случајот да се најде на суд. Сведоците кои ја виделе снимката пред нејзиното бришење, сведочеа за јасен сексуален напад. Кога сведочела и самата жртва и го реконструирала трауматичниот настан, обвинетите не покажале никакви знаци на каење а еден речиси заспал за време на постапката, пренесува Публика.
И покрај ДНК доказите и логовите од Воцап, осум од деветмина осудени мажи биле пуштени со условна казна и не минале ни ден во затвор. Деветтиот е осуден на две години и девет месеци затвор.
Случајот предизвика бес во Германија, како заради бруталноста на самото силување, така и за благите казни што им беа изречени на силувачите.
Во лавината реакции, идентитетот и телефонскиот број на еден од предаторите почнал да циркулира на Снепчет а бесни локаци му имаат пишувано мајки-шајки.
Гневна од веста за случај, 20-годишна девојка од Хамбург го споделила неговиот број преку WhatsApp, попат нарекувајќи го „свиња“ и “одвратен абортус“, со прашање „Зарем не ви е срам кога ќе се погледнете во огледало?“.
Наведениот потоа ја пријавил во полиција, против неа е подигнато обвинение за навреди и говор на омраза и осудена е еден викенд да мине во затвор - повеќе отколку осум од деветтемина силувачи. На суд, таа се извинила за нејзините коментари, велејќи дека постапила „рефлексно“ кога ги слушнала одвратните детали за случајот.
Според Хамбургер Абендблат, таа не е единствената која може да остане со пресуда за навреда на силувачите. Наводно, властите во Хамбург истражуваат 140 лица за прекршоци поврзани со „навреди, закани или друга штета“ кон предаторите од Штадпарк.
