Ескелунд тврди дека европските компании би можеле да останат конкурентни на глобалните пазари само ако самите станат дел од кинеските синџири на снабдување, на кои се обидуваат да им парираат.
Во повеќето индустрии, едноставно е исклучително тешко да се натпреварувате со Кинезите. Откажувањето од трговијата не е решението. Ако не можете да ги победите, придружете им се, вели Ескелунд, директор за кинески операции на транспортниот гигант „Maersk“.
Ова може да подразбира производство на стоки во Кина преку заеднички вложувања со европски компании.
Ова е еволуција во однос на минатото, кога доаѓавте во Кина за да го опслужувате кинескиот пазар, да произведувате во Кина за Кина. Сега пристапот е: бидете во Кина, но за целиот свет. Ова е прилично значајна промена, вели Ескелунд.
Трговскиот дефицит на Европската Унија во однос на Кина достигнува рекордни 1,18 милијарди евра дневно. Според предвидувања на Goldman Sachs, кинескиот извоз до крајот на деценијата ќе го намали бруто-домашниот производ на ЕУ за 0,5%, а на Германија за 0,9%.
Тоа, според Ескелунд води кон потенцијално катастрофално сценарио во кое производниот сектор би исчезнал од европските земји, што би значело и масовно губење на работни места, колапс на даночната база, потенцијална невработеност што би се пренесувала низ генерации и вртоглав пораст на трошоците за социјални давачки.
Егзистенцијална закана веќе почнува да се чувствува во европските сектори за автомобилска индустрија, хемиска индустрија и обновливи извори на енергија. Германската индустрија е погодена од двоен удар: намалени профити во Кина и евтина конкуренција на домашниот пазар од кинески компании како BYD, Geely и SAIC Motor. Минатата недела, BMW објави дека продажбата во Кина во првите девет месеци од годината опаднала за 22%.
Ако создадеме нови зависности, тоа на крајот може да резултира со губење на способноста на Европа сама да ја одредува својата иднина, масовно губење на работни места и разградување на заедниците, изјави Ескелунд во Брисел, каде што на претставници на Европската комисија им ги пренесе своите впечатоци од Пекинг.
Неговиот совет до лидерите на Европската Унија е да се вклучат во дијалог со Пекинг за да постигнат договор во кој и двете страни би создавале вредност.
Приоритети на Пекинг во новиот петгодишен план се секторите за вештачка интелигенција, квантно пресметување, роботика, паметни и „зелени“ технологии, биопроизводство, компјутерски импланти и 6G комуникации, со цел да се обезбеди доминација на глобалните пазари на соларни панели, ветерни турбини, роботи, автономни возила и напредни чипови.
Штом во Пекинг ќе се утврди стратегија, стимулациите, даночните олеснувања и субвенциите се спуштаат на сите нивоа – од регионите, па сè до градовите и селата. Службениците низ целата земја знаат на што треба да се фокусираат и што треба да направат.
