Завесата во новата сезона од најелитниот клупски европски ракомет чест да ја отвораат имаат екипите од А групата, бундеслигашот Рајн Некар Ловен кој ќе го пречека украинскиот тим Мотор Запоројже. Во истата група вечерва се игра и вториот дуел помеѓу Санк Петерсбург и Веспрем.
Натпреварите од првото коло од оваа група ќе ја комплетираат екипите на Загреб Кроација Осигурување и Цеље кој се среќаваат во сабота. Но тој ден вниманието на нашата спортска јавност ќе биде свртено кон Металург и Вардар кои ги играат првите мечеви во рамките на групата Ц.
Новата ракометна одисеја во Лигата на шампиони за екипата од Автокоманда започнува на гости против Швајцарски Тун, а македонскиот ракометен шампион во салата „Борис Трајковски" ќе ја нагости моќната Барселона.
Вардарци по пауза од три години се враќаат на голема врата и со нова раководна структура во најелитната ракометна меѓународна сцена, а овој дуел освен што ќе биде тежок за „Црно црните" привлекува огромно внимание поради дуелот на браќата Лазарови.
Групата во која се паднаа Металург и Вардар ја надополнуваат и екипите на ПСЖ и Динамо Минск кои ќе се сретнат истиот ден.
Доказ за тежината во оваа група за нашите два претставници се предвидувањата на светските обложувалници според кои Барселона е фаворит за освојување на титулата со коефициент 2.5, а втор е ПСЖ со 3.6.
Коефицинетот за освојување на пехарот кај Металурзите е 101, а Вардар е во друштво со уште 6 екипи на последното место според шансите со 501.
